لیستی مووچەی سەرجەم ئەو وەزارەتانەی ماونەتەوە لە SNNوە بڵاودەکرێتەوە

SNN-عەلی حەمە سەعید

وەزارەتی دارایی و ئابووری حكومەتی هەرێم لە سبەینێوە دەستدەكاتەوە بە دابەشكردنی مووچەی ئەو وەزارەت و دەستانە كە تا ئێستا مووچەی مانگی حوزەیرانیان وەرنەگرتووە، بەرپرسێكی باڵای وەزارەتی دارایش وادەی دابەشكردنی مووچەی سەرجەم وەزارەتەكان و خانەنشینان بۆ SNNئاشكرا دەكات.

بە گوێرەی ئەو زانیاریانەی كە لەبەرپرسێكی باڵای وەزارەتی دارایی بە SNNدراون سبەی یەك شەممە 11/7/2021 مووچەی مانگی حوزەیانی هەریەكە لە وەزارەتەكانی ( كارەبا، خوێندنی باڵا و شارەوانی) بە لێبڕینی لە %21 خەرجدەكرێت.

ئاماژەی بەوەشكرد، ڕۆژی دووشەممە 12/7/2021 دابەشكردنی مووچە بەردەوامی دەبێت و هەریەكە لە وەزارەتەكانی ( كشتوكاڵ و سەرچاوەكانی ئاو، ڕۆشنبیری و لاوان، ئاوەدانكردنەوە و نیشتەجێكردن) دابەشدەكرێت ئەگەریش هەیە كە لەگەڵ مووچەی ئەو وەزارەتانە مووچەی هەریەكە لە (سەرۆكایەتی هەرێم، سەرۆكایەتی پەرلەمان، ئەنجومەنی وەزیران و خانەنشینی سەربازی) دابەشبكرێت بۆیە ئەگەر ڕۆژی دووشەممە ئەو شوێنانە مووچەیان پێنەدرا بەدڵنیاییەوە ڕۆژی سێ‌ شەممە 13/7/2021 مووچەی ئەو شێنانەش دابەشدەكرێت.

ئەو بەرپرسەی وەزارەتی دارایی و ئابووری ئەوەشی خستەڕوو، لە دوای دابەشكردنی مووچەی خانەنشینی سەربازی لە ڕۆژی دووشەممە یان سێ‌شەممە، ئەوا ڕۆژی دواتر ڕاستەوخۆ مووچەی خانەنشینی شارستانیش دابەشدەكرێت و بەجۆرەش دابەشكردنی مووچەی مانگی حوزەیران كۆتایی دێت.