“لە ماوەی یەک مانگدا 200 کەس بەناوی خەڵاتەوە لە هەرێمی کوردستان هاک کراون”
SNN
لە ئێستادا دیاردەیەکی نوێی هاککردن بڵاوبووەتەوە بە ناوى بردنەوەى دیارى و خەڵاتەوە پەیوەندى بە کەسێک دەکەن و پاش پەیوەندیەکەش هەموو داتا و زانیاریەکانى نێو مۆبایلەکەى دەبرێت.
پێشەوا جەزا، بەڕێوبەرى ئایتى کۆپانیاى “ئۆنڵاین گارد” بە SNNى راگەیاند:” جۆرێکى نوێى هاککردن لە تۆڕەکۆمەڵایەتیەکان بە دیاریى کراوى لە فەیسبووک و ماسنجەر پەیدا بووە بەوەى پەیوەندیت پێوە دەکەن کەوا تۆ بووى بە خاوەنى خەڵات و و دیارى یان لە لایەن شوێنێکى دیارى کراوەوە خەڵات دەکرێت، پاش قەناعەت پێکردنى ئەو کەسە داوا دەکەن کە کۆدێک بۆ ژمارە مۆبایلەکەى دێت ئەویش بۆیان بنیرێت تاوەکو بتوانن ڕێکارەکانى بە باشى بۆ ئەنجام بدەن، بەڵام گرفتەکە لێرەوە دەستپێدەکات پاش ناردنەوەى ئەو کۆدە بۆ ئەو گروپە هاککەرە ڕاستەوخۆ و داتاو زانیارى و وێنەى نێو مۆبایلەکەت دەکەێتە دەستیان و ئەو کەسە تووشى کێشە دەکەن”.
وتیشى”ئەم کێشە لە ئێستادا زۆربووە و لە مانگێکدا زیاتر لە 200کەیسى لەم جۆرە ڕومان لێدەکەت بۆ ئەوەى کێشەکەى بۆ چارەسەر بەکەین ئەمە جگە لەوەى لە شارەکانى دیکەى کوردستانەوە بۆ ئەم جۆرە کێشانە پەیوەندیمان پێوەدەکرێت”.
هاوکات ڕوونى کردەوە”ئەم جۆرە هاککردنە زۆرجار کێشەى کۆمەڵایەتى لێ دەکەوێـەوە چونکە وێنە و ڤیدیۆى تایبەتى ناو مۆبایلى ئەو کەسانە براوە کە دەکەونە داوى هاککەرەکانەوە لە بەرامبەردا داواى کارتى مۆبایل یان پارەى زۆریان لێ دەکرێت”.
جەختیشى کردەوە” داوا لە هاووڵاتیان دەکەین کە بە هیچ شێوەیەک وەڵامی ئەو جۆرە کەسانە نەدەنەوە و لە هەر شوێنێک هەر کەسێک داوای هەر جۆرە کۆدێکی لێکردن کۆدی خۆتانی بۆ مەنێرن و پەیوەندییەکە دابخنەوە یان لایەنی پەیوەندیدار ئاگادار بکەنەوە، ئەگەر هاتوو رووبەڕووی کێشەیەکی لەم جۆرە بوونەوە بە زوترین کات سەردانمان بکەن بۆ چارەسەرکردنی کێشەکەتان و بە زوترین کات هێنانەوەی ئەکاونتەکەتان بێگومان بتوانرێت ڕێکارى یاسایشیان بەرامبەر بگیرێتە بەر”.
