حکومەتی هەرێم لیستی ناوی تاقانەکانی جینۆسایدی بڵاوکردەوە

SNN

وه‌زاره‌تی كاروباری شه‌هیدان و ئه‌نفالكراوانی حكومه‌تی هه‌رێمی كوردستان، لیستی ناوی تاقه‌كانه‌كانی جینۆسایدی بڵاوكرده‌وه‌ و به‌گوێره‌ی لیسته‌كه‌ش، زیاتر لە 300 کەسن.

وه‌زاره‌تی كاروباری شه‌هیدان و ئه‌نفالكراوان له‌راگه‌یه‌ندراوێكدا باسی لەوەکردوە: “پاش پێكهێنانی لیژنه‌ی تایبه‌تمه‌ند بۆ تۆماری تاقانه‌كانی جینۆساید، به‌پێی یاسای ماف و ئیمتیازاتی تاقانه‌كانی جینۆساید له‌ هه‌رێمی كوردستان و لیژنه‌ی وردبینی و پێداچونه‌وه‌ به‌ دۆسیه‌ی تاقانه‌كانی جینۆساید به‌پێی یاسای چاكسازی له‌ وه‌زاره‌تی كاروباری شه‌هیدان و ئه‌نفالكراوان ناوی 312 تاقانه‌ی جینۆسایدیان په‌سه‌ندكردوه‌.

ئاماژەی بەوەشکردوە: بڕیاریانداوه‌ به‌ ره‌تكردنه‌وه‌ی دۆسیه‌ی 42 كه‌س كه‌ حوكمه‌كانی یاسای ماف و ئیمتیازاتی تاقانه‌كانی جینۆساید نایانگرێته‌وه‌، هه‌روه‌ها بڕیاردراوه‌ به‌ گه‌ڕانه‌وه‌ی 64 داواكاری بۆ به‌ڕێوه‌به‌رایه‌تیه‌ گشتییه‌كان به‌هۆی ناته‌واوی به‌ڵگه‌نامه‌ی ناو دۆسیه‌كانیان.