تورکیا چەکدارانی سوری لە شەڕی ئەفغانستاندا بەکاردەهێنێت

SNN

گروپە چەکدارە سوورییەکانی باکووری سوریا کە لە رابردوودا بەشداری جەنگی چەند وڵاتێکی جیاوازیان کردووە لە بەرژەوەندی تورکیا، ئەمجارە لەلایەن تورکیاوە گواستراونەتەوە بۆ ئەفغانستان تا دژ بە تاڵیبان بجەنگێن.

فەهیم تاشتکین رۆژنامەنووسی دیاری تورکی لە چاوپێکەوتنێکیدا لەگەڵ کەناڵێکی رووسی، بۆ یەکەمجار ئەم زانیاریەی ئاشکراکرد و و وتیشی: “چەند گروپێکی چەکداری بە رەچەڵەک سوریی، لەلایەن هێزی ئاسمانی تورکیاوە و بە پاڵپشتی سەربازانی تورکیا، گواستراونەتەوە بۆ ئەفغانستان تا بەشداری بکەن لە شەڕی کۆنتڕۆڵکردنەوەی فڕۆکەخانەی نێودەوڵەتی کابول کە تاڵیبان لەوێ پێشڕەوی کردووە و لە هەوڵدایە بە تەواوی دەستی بەسەردا بگرێت”.

ئەوەشی ئاشکراکردووە، ئەو چەکدارە سووریانە لە چەند گروپێک پێکهاتوون و بەرەی نوسرەشیان لەناودایە.

ئەو گروپە چەکدارییانەی کە براونەتە ئەفغانستان پێشتر بەشداری شەڕی ناوخۆی لیبیا، شەڕی ناوچەی جێناکۆکی ناگۆرنی قەرەباغی نێوان ئەرمینیا و ئازەربایجان-یان کردووە.
ئەو چەکدارانە کە لە رابردوودا بەشداری شەڕی ناوچەکانی رۆژئاوای کوردستانیان کردووە و دژ بە هەسەدە جەنگاون، لەلایەن تورکیاوە پاڵپشتی داراییان دەکرێت و مەشق و راهێنانیان پێدەکرێت.