بەرپرسێکی ئیدارەی ئەمریکا راگەیەندراوێکی نوسینگەی کازمی بەدرۆدەخاتەوە

SNN

دوای ئەوەی نوسینگەی مستەفا کازمی سەرۆکوەزیرانی عێراق بڵاویکردەوە، لە کۆبوونەوەی نێوان کازمی و برێت مەکگۆرگ پرسی کشانەوەی هێزەکانی ئەمریکا تاوتوێ کراوە، بەرپرسێکی باڵای ئیدارەی بایدن ئەو هەواڵە رەتدەکاتەوە.

ئەو بەرپرسە باڵایەی ئیدارەی ئەمریکا بە گۆڤاری نیوزویکی ئەمریکی وتووە “راست نییە کە دەوترێت لە کۆبوونەوەکەدا تاوتوێی پرسی کشانەوەی هێزەکانی ئەمریکا کراوە”.

برێت مەکگۆرک رێکخەری کاروباری رۆژهەڵاتی ناوەڕاست لە ئیدارەی بایدنی سەرۆكی ئەمەریكا بە سەردانێكی رانەگەیەندراو لە عێراق بوو، لەگەڵ سەرۆکوەزیرانی عێراق کۆبووەوە، دواتر نوسینگەی کازمی لە راگەیەندراوێکدا ناوەڕۆکی کۆبوونەوەکەی خستەڕوو.

سەردانەکەی مەکگۆرک هاوکاتە لەگەڵ سەردانی مەحمود عەلەوی وەزیری ئیتیلاعاتی ئێران بۆ عێراق.
ئەم سەردانانەش لە كاتێكدایە كە لەم دواییانەدا هێرشى میلیشیاکان لە عێراق و سووریا دژ بە بەرژەوەندییەكانی ئەمەریكا لە ھەڵكشان بووە، پێشتریش وەزارەتی دەرەوەی ئەمەریكا ھۆشداری بە ئێران دابوو، كە پێویستە دەستبەجێ پشتیوانییەکانی بۆ ئەو میلیشیایانە بوەستێنێت.

لە ئێستادا دوو هەزار و 500 بۆ سێ هەزار و 500 سەربازی ئەمریکی لە عێراق بوونیان هەیە و مانەوەیان لەسەر رەزامەندی حکومەتی عێراقە، ئەمریکا جەخت لەوەدەکاتەوە کە مانەوەی هێزەکانی لە عێراق لەپێناو بەردەوامیدانە بە شەڕی دژ بە داعش و رێگریکردن لە سەرهەڵدانەوەی.