ناسنامەی بکوژی هیشام هاشمی ئاشکرا کرا

SNN

ئاژانسی فەرمی هەواڵی عێراق ناسنامەی تۆمەتباری سەرەکی کوشتنی هیشام هاشمی شرۆڤەکاری ستراتیژی و ئەمنی ئاشکرا کرد.

بەپێی هەواڵێکی ئاژانسەکە، ئەحمەد کینانی لەدایکبووی 1985 بە تۆمەتی کوشتنی هیشام هاشمی دەستگیرکراوە و دانی بە تاوانەکەیدا ناوە.

ئاماژەی بەوەشکردوە، تۆمەتبارەکە لە ساڵی 2007ەوە لە وەزارەتی ناوخۆ دامەزراوە و پلەکەی مولازمە و باسی لەوەشکردوە، کە ئەندامی “گروپە لەیاسا دەرچووەکان”ە.

لەلایەکی ترەوە بە پێی چەند سەرچاوەیەک و بە گوێرەی دانپیانانی کینانی، “ئێوارەی رۆژی شەشی تەموزی ساڵی رابردوو بکوژانی هیشام هاشمی بە ئۆتۆمبێلێک و دوو ماتۆرسکیلەوە لە سەر شەقامی ماڵی ئەو شرۆڤەکارە چاوەڕێیان کردووە و لەگەڵ گەڕانەوەی هاشمی بۆ ماڵەکەی بە دەمانچە تەقەیان لێکردووە”.

بڵاوکردنەوەی ناسنامەی تۆمەتباری سەرەکی کوشتنی هیشام هاشمی دوای ئەوە دێت، کە مستەفا کازمی لە تویتێکدا هەواڵی دەستگیرکردنی بکوژانی ئەو شرۆڤەکارەی بڵاوکردبوەوە.