“پێویستە بۆ ماوەی دوو هەفتە یان مانگێک قەدەغەی هاتووچۆ لە دهۆک رابگەیەنرێت”

SNN

وتەبێژی بەڕێوەبەرایەتی گشتی تەندروستی دهۆك بەپێویستی دەزانێت حكومەتی هەرێمی كوردستان بۆ ماوەی دوو هەفتە، تا مانگێك قەدەغەی هاتووچۆ ڕابگەیەنێت، بەپێچەوانەوە بارودۆخی بڵاوبونەوەی ڤایرۆسی كۆرۆنا “زۆر خراپ دەبێت”.

حەمزە رەزیكی وتەبێژی بەڕێوەبەرایەتی گشتی تەندروستی دهۆك لەپەیامێكی ڤیدیۆییدا ڕایگەیاند: “ئەگەر حكومەتی هەرێمی كوردستان بۆ ماوەی دوو هەفتە، تا مانگێك قەدەغەی هاتووچۆ ڕابگەیەنێت، ڕەنگە دۆخی بڵاوبونەوەی ڤایرۆسی كۆرۆنا و ئامادەكارییە تەندروستییەكانی پەیوەست بەم بابەتە باشتر كۆنترۆڵبكرێن”.

وتەبێژی بەڕێوەبەرایەتی گشتی تەندروستی دهۆك دەڵێت:”ئەگەر قەدەغەی هاتووچۆ ڕانەگەیەنرێت، بارودۆخی بڵاوبونەوەی ڤایرۆسی كۆرۆنا زۆر خراپ دەبێت”.

ژمارەی تووشبووانی ڤایرۆسی كۆرۆنا لەپارێزگای دهۆك بەشێوەیەكی بەرچاو ڕووی لە زیادبوون كردووە و لە ئێستادا لە سەرو ڕیزبەندی زۆربەی شارەكانی هەرێمی كوردستانەوەیە، لەڕووی تۆماركردنی زۆرترین حاڵەتەكانی تووشبوون بە پەتای کۆرۆنا.