بڕیارەكانی قوباد تاڵەبانی لە هەڵەبجەش دەچێتە بواری جێبەجێکردنەوە
SNN-عەلی حەمە سەعید
بەڕێوەبەری هاتووچۆی پارێزگای هەڵەبجە ئاماژە بەوەدەكات لەگەڵ ئەوەی ماوەیەكی زۆرە ئێمە ڕێگەمان نەداوە بە هاتووچۆی ئۆتۆمبێلی جاڕەش و بێسەرەتا، بەڵام لەسەر بڕیارەكانی جێگری سەرۆكی حكومەت ئێمە لە سبەینێوە ڕێكارەكانمان توندتر دەكەینەوە و هەر ئۆتۆمبێلێكی جامڕەش و بێسەرەتا ببینین دەستيبەسەردا دەگرین.
عەمید حەسەن عەبدوڵا، بەڕێوەبەری هاتووچۆی پارێزگای هەڵەبجە بە SNNی ڕاگەیاند: ئێمە لە سنوری بەڕێوەبەرایەتی هاتووچۆی پارێزگای هەڵەبجە مەفەرەزەكانمان بەردەوام بوون لە دەستبەسەرداگرتنی ئۆتۆمبێلی بێسەرەتا و جامڕەش و ئەو شۆفێرانەی كە پێچەوانەی یاسا ئۆتۆمبێلیان بەكارهێناوە، هەر لەو چوارچێوەیەشدا دەيان ئۆتۆمبێل دەستیانبەسەرداگیراوە و ئەو ئۆتۆمبیلانەشی كە جام رەش بوون، لەزگەكانیان لێكراوەتەوە و جامەكانیان كراوەتە بە جامی ئاسایی پاشان بەردراون.
ئاماژەی بەوەشكرد، لەسەر بڕیارەكانی ( قوباد تاڵەبانی ) جێگری سەرۆكی حكومەتی هەرێم بە دڵنیاییەوە ئێمە لە سبەینیوە رێكارەكان توندتر دەكەینەوە و بڕیارەكانی تایبەت بە دەستبەسەرداگرتنی ئۆتۆمبێلی جامڕەش و ئۆتۆمبێلی بێسەرەتا، جێبەجێدەکەين شۆفێرەكانیان ڕووبەڕووی یاسا دەكەینەوە، ئەوەش لە پێناو بەرژەوەندی گشتی و زیاتر پاراستنی هێنمی و ئارامی شارە لە هەر ڕووداوێكی نەخوزارو كە بەهۆی ئەو ئۆتۆمبێلانەوە ئەنجامبدرێت.
وتەكانی بەڕێوەبەری هاتووچۆی پارێزگای هەڵەبجە لەكاتێكدایە كە بە بڕیاری قوباد تاڵەبانی جێگری سەرۆكی حكومەت وابڕیارە سبەی لە هەڵمەتێكی فراواندا دەستبكرێت بە دەستبەسەرداگرتنی ئۆتۆمبێلی بێسەرەتاو جامڕەش، ئەوەش لە پێناو ئارامی شار و كەمكردنەوەی ئەو تاوانانەی كە بەهۆی ئەو ئۆتۆمبیلانەوە ئەنجام دەدرێت.
