مستەفا کازمی: چیتر پێویستمان بە هێزی شەڕکەری ئەمریکا نییە
مستەفا کازمی، وێنە: AP
SNN
سەرۆکوەزیرانی عێراق رایگەیاند: وڵاتەکە چیتر پێویستی بە هێزی شەڕکەری ئەمریکی نییە بۆ شەڕکردن لە دژی داعش، بەڵام کشانەوەی هێزەکانی ئەمریکا لەسەر گفتوگۆ ستراتیژییەکانی نێوان عێراق و ئەمریکا بەندە کە لەم هەفتەیەدا بەڕێوەدەچێت.
مستەفا کازمی سەرۆکوەزیرانی عێراق لە چاوپێکەوتنێکیدا لەگەڵ ئاژانسی ئەسۆسیەیتد پرێس رایگەیاند: داوا لە ئەمریکا دەکەین کە مەشق و راهێنان و هاوکارییە هەواڵگرییەکانی بەردەوام بێت، بەڵام پێویستمان بە هیچ هێزێکی شەڕکەری بیانی لە خاکی عێراق نەماوە، سوپای عێراق لەتوانایدایە بەرگری لە وڵاتەکە بکات بەبێ بوونی هێزەکانی هاوپەیمانان.
کازمی وتی “لە ماوەی رابردوودا توانای سوپاکەمان لە شەڕی دژ بە داعش سەلماندووە”.
ئەسۆسیەیتد پرێس ئەوەشی خستووەتەڕوو، ئەگەری هەیە وادەی کشانەوەی هێزەکانی ئەمریکا لە خاکی عێراق بگاتە کۆتایی ئەمساڵ.
ئەمریکا لە دەوروبەری دوو هەزار و 500 راوێژکاری سەربازی لە خاکی عێراق هەیە، پرسی مانەوەی ئەو هێزانە لە عێراق تا ئێستا، بووەتە جێگەی نیگەرانی هێزەکانی حەشدی شەعبی، بەتایبەت ئەو هێزانەی کە نزیکن لە ئێرانەوە، هۆشداری هێرشی زیاتر بۆ سەر هێزەکانی ئەمریکا دەدەن.
