نەتەوەیەکگرتووەکان ئاماری قوربانیانی مەدەنی شەڕ لە ئەفغانستان بڵاو دەکاتەوە

SNN

لە شەش مانگی یەکەمی ئەمساڵدا زیاتر لە پێنج هەزار مەدەنی لە ئەفغانستان بوونە قوربانی شەڕ و پێکدادانەکان و زۆرترینیشیان لە لایەن تالیبانەوە کراونەتە ئامانج.

نوێنەرایەتی نەتەوەیەکگرتووەکان لە ئەفغانستان ئامارێکی شەڕ و توندوتیژییەکانی ئەو وڵاتەی بڵاوکردەوە کە تیایدا هاتووە، لە شەش مانگی یەکەمی ئەمساڵدا هەزار و 659 هاوڵاتی مەدەنی لەو وڵاتە كوژراون و سێ هەزار و 254 كەسیش برینداربوون.
ئاماژەی بەوەشکردووە، کە بە بەراورد لەگەڵ ماوەی هاوشێوەی ساڵی رابردوو قوربانیانی مەدەنی شەڕ لە ئەفغانستان بە رێژەی 47٪ زیادیان کردوە.

وەک لە راپۆرتەکەی نەتەوەیەکگرتووەکاندا هاتووە: 39٪ی قوربانیان لە لایەن تالیبانەوە کراونەتە ئامانج و 2٪ لە لایەن هێزەکانی سەر بە حکومەتی ئەفغانستانەوە پێکراون و ئەوانی دیکە لە ئەنجامی هێرشی گروپە بەرهەڵستکارەکانی دیکەی حکومەتی ئەفغانستان و چەکدارانی داعشەوە بوونە قوربانی.

نەتەوە یەکگرتووەکان راشیگەیاندوە، لە دوای مانگی ئایارەوە کە کشانەوەی هێزەکانی ئەمریکا و ناتۆ لە ئەفغانستان دەستیپێکردووە، ژمارەی قوربانیانی مەدەنی زیاتر بەرزبووەتەوە.