پۆلیسی سلێمانی: لەدوای جێبەجێکردنی بڕیارەکانی قوباد تاڵەبانی هیچ رووداوێکی تەقەکردن و دزی رووینەداوە

SNN

لە 25ى تەمووز ەوە و بە بڕیارى جێگرى سەرۆکى حکومەتى هەرێمى کوردستان لیژنەیەکى هاوبەش لە هێزە ئەمنیەکانى شارى سلێمانى پێکهێنراوە بۆ بنبڕکردنى دیاردەى چەک هەڵگرتن و ئۆتۆمبێلى بێسەرەتا و جام ڕەش، وتەبێژى پۆلیسى سلێمانیش دەڵێت: “لە پاش جێبەجێ کردنى ئەو بڕیارەوە شارى سلێمانى بەتەواوەتى ئارام بۆتەوەتەوە”.

سەرکەوت ئەحمەد، وتەبێژى پۆلیسى سلێمانى بەSNNی ڕاگەیاند: “ئەو لیژنەیەى دیارى کراوە بۆ دەست بەسرا گرتنى چەکى بێ مۆڵەت و ئۆتۆمبێلى بێ سەرەتا و جام ڕەش لە کارەکانى بەردەوامە و بە شێوەى مەفرەزە لە شوێنە جیاجیاکانى شارى سلێمانى بەردەوام لە ئەرکدان و بە پێى پلان شەو و ڕۆژ بازگە دادەنێن”.

وتیشى: “لەوەتەى ئەو لیژنەیە دەستى بە کارەکانى کردوە هیچ ڕوداوێکى تەقەکردن و دزى کردن و شەڕ ڕووینەداوە و شارى سلێمانى ئارامى تەواوى بە خۆوە بینیەوە”.

ئاماژەى بەوەش کرد: “ئەرکەکانمان بەردەوامى دەبێت تاوەکو ئەو کاتەى کە ئەو حاڵەتە نەشازانە بنبڕ دەکرێت و یاسا لە سەرووى هەموو شتێکەوە سەرەوەر دەبێت”.