لە هێرشێکی داعشدا لە جەلەولا چوار کەس کوژراون و پێنج کەسيش برينداربوون

SNN

بەڕێوەبەری ئاسایشی ناحیەی کۆکز رایگەیاند: “سەرلەبەیانی ئەمڕۆ چەکدارانی داعش هێرشیانکردووەتەسەر بازگەی حەلوان لەباکووری ناحیەی جەلەولا و بەوهۆیەشەوە چوار کەس کوژراون و پێنج کەسی دیکەش برینداربوون”.

شەماڵ عەبدولرەحمان بەڕێوەبەری ئاسایشی ناحییەی کۆکز لە لێدوانێکيدا رايگەیاندووە: “سەرەتا چەکدارەکان هێرشیانکردووەتە سەر بازگەکە و بەوهۆیەشەوە سێ سەربازی سوپای عێراقی کوژراون و سێ سەربازی دیکەش برینداربوون”.

ئاماژەی بەوەشکردووە: “کاتێک کە ئۆتۆمبێلی فریاکەوتنی تەندروستی بەمەبەستی بەدەمەوەچوونی سەربازانی بازگەکە بەرەو شوێنی رووداوەکە رۆشتووە، چەکدارانی داعش تەقەیان لە ئۆتۆمبێلەکە کردووە و بەوهۆیەشەوە، شۆفێری ئۆتۆمبێلەکە کوژراوە و کارمەندێکی تەندروستیش برینداربووە”.

شەماڵ عەبدولرەحمان باسی لەوەشکردووە: “بازگەکە سەربازانی فەوجی چواری سەر بە لیوای یەکی سوپای عێراقی تێدایە و سەرباری زیانە گیانییەکان، ئۆتۆمبێلێکی فریاکەوتن و هەمەرێکی سەربازی سوپای عێراقیش سوتاون”.