وەزیری پلاندانانی عێراق پلانێکی هەیە بۆ ئەو کاتەی نرخی نەوت دەگاتە 120 دۆلار

SNN

خالید بەتال وەزیری پلاندانانی عێراق ڕایگەیاند، ئەگەر نرخی بەرمیلێك نەوت ببێتە 120 دۆلاریش نابێت لە ئێستادا خەرج بكرێت و پێویستە لە سندوقێكدا هەڵگیرێت بۆ پاش دوو ساڵیتر كە تەنگەژەی ئابووری چاوەڕوان دەكرێت.

وەزیری پلاندانانی عێراق، لە چاوپێکەوتنێکی تەلەفیۆنیدا وەڵامی پرسیارێكی باوی دایەوە لەبارەی چارەنووسی ئەو پارە زیادەی لە نرخی نەوتدا دەمێنێتەوە لەكاتێكدا لە بودجەدا بە 45 دۆلار خەمڵێنراوە و وتی “خەرجكردنی زۆر هەڵەی بۆماوەی حكومەتەكانی پێشووە”.

بەتال جەختی لەوەشكردەوە ئەگەر نرخی بەرمیلێك نەوتی خاو بگاتە 120 دۆلاریش، نابێت خەرج بكرێت و پێویستە كەڵك لەو پارەیە وەربگیرێت بۆ دوو ساڵیتر كە ئەگەری تەنگەژەی ئابووری هەیە و نابێت لە ئێستادا بەهیچ جۆرێك كەس چاو لەو پارە زیادەی نەوت بكات، چونکە لە عێراقدا بەردەوام قەیران لە دوای قەیران دروست دەبێت و تاکە چارەسەریش بوونی پارای یەدەگ و ئەو پارەیەیە کە بۆ کاتی قەیرانەکان دادەنرێت.