وادەی ئەنجامدانی تیروپشك بۆ كارمەندانی سەر سندوقەكانی دەنگدان دیاریكرا

SNN-عەلی حەمە سەعید
بەرپرسی ئۆفیسی سلێمانی كۆمیسیۆنی باڵای سەربەخۆی هەڵبژاردنەكانی عێراق ئاماژە بەوەدەكات ئەمڕۆ دوا وادەبوو بۆ پڕكردنەوەی فۆڕمی بوون بە چاودێری سەرسندوقەكانی هەڵبژاردن، لەسەرەتای مانگی داهاتوو تیروپشك بۆ دیاریكردنی ناوی كارمەندان ئەنجام دەدرێت.

ئامانج عەزیز، بەرپرسی ئۆفیسی سلێمانی كۆمیسیۆنی باڵای سەربەخۆی هەڵبژاردنەكانی عێراق بە SNNی ڕاگەیاند: بە گوێرەی ئەو وادەیەی كە ئەنجومەنی باڵای كۆمیسیارانی سە بە كۆمیسیۆن داین نابوو ئەمڕۆ كۆتایی بە پڕكردنەوە فۆڕمی تایبەت بە بوون بە چاودێری سەر سندوقەكانی هەڵبژاردن كۆتایی هات، بەڵام هێشتا ژمارەیەكی زۆر لە هاووڵاتیان فۆڕمەكەیان پڕكردووەتەوە و هێشتا نەیانگەڕانووەتەوە بۆ بنكەكانی دەنگدان بۆیە هێشتا وادەی وەرگرتنەوەی فۆڕمەكان كۆتایی نەهاتووە و تەنها كۆتایی بە پڕكردنەوەی فۆڕم هاتووە.

ئاماژەی بەوەشكرد: ئێمە لە سنوری پارێزگای سلێمانی پێویستیمان بە 17 هەزار كارمەند دەبێت وەك چاودێر لەسەر سندوقەكانی هەڵبژاردن، بەڵام ژمارەیەكی زۆر لەوە زیاتر فۆڕم پڕكراونەتەوە، بۆیە دەبێت هەموو ئەو فۆڕمانە وردەكاری بكرێن و پێداوچوونەوەیان بۆ بكرێت و پاشان ناوەكان داخڵی كۆمپیوتەر بكرێن و ئێمەش ڕەوانەی بەغدایان بكەین.

بەرپرسی ئۆفیسی سلێمانی كۆمیسیۆنی باڵای سەربەخۆی هەڵبژاردنەكانی عێراق، ئەوەشی خستەڕوو: تا ئەوكاتەی هەموو ئەو رێكارانە دەگیرێتە بەر پێویستمان بە كاتێكی باش دەبێت بۆ ئەوەی مافی كەس نەفەوتێت و پرۆسەكە بە شێوەیەكی شەفاف بەڕێوەبچێت بۆیە پرۆسەی ئەنجامدانی تیروپشك بۆ دیاریكردنی ناوی كارمەندانی سەر سندوقی هەڵبژاردن لەسەرەتای مانگی داهاتوو ئەنجام دەدرێت.