پلاندانانی عێراق پرۆژەیەکی نوێ بۆ دابەشکردنی مووچە دەخاتە بواری جێبەجێکردنەوە

SNN

وەزارەتی پلاندانانی عێراق ئاشکرای کرد، بە مەبەستی دەرخستنی ژمارەی راستەقینەی مووچەخۆران و فەرمانبەران، پرۆژەی بەستنەوەی ژمارەی فەرمانبەران بە کارتی نیشتمانی و بایۆمەترییەوە دەخرێتەکار.

لەراگەیەنراوێکدا وەزارەتی پلاندانانی عێراق ئاماژەی بەوەکردوە: پرۆژەی ژمارەی فەرمانبەر و بەستنەوەی بەکارتی نیشتیمانی و بایۆمەترییەوە بۆ سەرجەم فەرمانبەرانی دەوڵەت دەچێتە بواری جێبەجێکردنەوە.

راشیگەیاندوە: ” پرۆژەکە بە ئامانجی کۆکردنەوەی زانیاری ورد و ژمارەی راستەقینەی فەرمانبەران و مووچەخۆران دەبێت بۆ وێنەیەکی رونتر بداتە حکومەت”.

وەزارەتی پلاندانانی عێراق ئەوەشی خستوەتەڕوو، لە فەرمانگەکانی وەزارەتی پلاندانان لە بەغدا پرۆژەکە تاقیکراوەتەوە و دەرکەوتووە بەکارهێنانی سەکۆی ئەلیکترۆنی وەک بانکی زانیاری فەرمانبەران سەرکەوتوو بووە.

ئاشکراشی کردوە: دوای تەواوبوونی کۆکردنەوەی زانیاری سەرجەم فەرمانبەران مووچەکانیان لە رێگەی ئەم پرۆژەوە دابەش دەکرێت.