وەزارەتی کۆچ و کۆچبەرانی عێراق: 600 هەزار خێزانی ئاوارە گەڕاونەتەوە بۆ زێدی خۆیان
SNN
وەزارەتی کۆچ و کۆچبەرانی عێراق رایگەیاند، کە تا ئێستا 600 ھەزار خێزانی ئاوارە گەڕاونەتەوە زێدی خۆیان.
عەلی عەباس جیھانگیر، وتەبێژی وەزارەتی کۆچ و کۆچبەرانی عێراق، لە لێدوانێکی رۆژنامەوانییدا ئاماژەی بەوەداوە کە لەئێستادا، 37 ھەزار خێزانی ئاوارە ماوەن بگەڕێنەوە زێدی خۆیان و وتی: “ئەو 37 ھەزار خێزانە ئاوارەیە لە کەمپەکانی ھەرێمی کوردستاندا، نیشتەجێن”.
وتیشی: “زۆربەی ئاوارەکانی قەزای شنگال و ناوچەکانی دەورووبەری لە کەمپەکانی ھەرێمی کوردستاندا نیشتەجێن”.
عەلی عەباس جیھانگیر ئاشکراشیکردووە کە بەپێی ئەوەی لای وەزارەتی کۆچ و کۆچبەران تۆمارکراوە، تا ئێستا 600 ھەزار خێزانی ئاوارە گەڕاونەتەوە زێدی خۆیان.
وتەبێژی وەزارەتی کۆچ و کۆچبەرانی عێراق، راشیگەیاند کە دەرگای گەڕانەوە لە بەردەم خێزانە ئاوارەکان بۆ زێدی خۆیان کراوەیە و وتی: “گەڕانەوەی خێزانە ئاوارەکان بۆ زێدی خۆیان پەیوەستە بە ژمارەیەک ھۆکار لەوانە خواستی خێزانە ئاوارەکان لەوەی دەیانەوێت بگەڕێنەوە زێدی خۆیان یان دەیانەوێت لە کەمپەکاندا بمێننەوە”.
بەھۆی ھێرش و پەلامارەکانی داعش بۆسەر بەشێک لە ناوچەکانی عێراق لە ھاوینی 2014دا، نزیکەی پێنج ملیۆن و 500 ھەزار عێراقی ئاوارەبوون کە بەشێکیان وەک پەنابەر روویان لە وڵاتانی دراوسێ و وڵاتانی ئەورووپا کردووە.
