تورکیا گرتووخانەی گەورەتر بۆ جێکردنەوەی سیاسەتمەدارە ئۆپۆزسیۆنەکان دروستدەکات

SNN

رۆژنامەی فۆرێن پۆڵسی ئەمریکی لە بەدواداچوونێکیدا ئاشکرایکردووە کە ژمارە و قەبارەی گرتووخانەکانی تورکیا بەشێوەیەکی بەرچاو زیادیانکردووە و دەشڵێت “ئەمە بۆ جێکردنەوەی سیاسەتمەدارە ئۆپۆزسیۆنەکانە لە زیندان لەنێویشیاندا ئەوانەی کە سەر بە پارتی هەدەپەن”.

بەگوێرەی چەند وێنەیەکی مانگی دەستکرد، لە نێوان مانگی تەمووزی 2016 تا ئازاری 2021، 131 گرتووخانەی نوێ لە تورکیا دروستکراون.

وەزارەتی دادی تورکیاش پێشتر لە راگەیەندراوەکانیدا باسی لەوەکردبوو کە 100 گرتووخانەی دیکە لەلایەن حکومەتەوە دروستدەکرێت.

رۆژنامە ئەمریکییەکە ئەوەشی نوسیووە، دوای ئەوەی کودەتا شکستخواردووەکەی تورکیا روویدا و هەڵمەتێکی دەستگیرکردن لە وڵاتەکە دەستیپێکرد، پرسی پێشێلکاری مافی مرۆڤ لە تورکیا بووە مایەی نیگەرانی کۆمەڵگای نێودەوڵەتی، بەڵام تەنانەت لەو کاتەشدا 64 گرتووخانە لە قۆناغی بنیادناندا بوون.

جگە لە زیادبوونی ژمارەیان، گرتووخانەکان لە قەبارەشدا گەورەترکراون و زەوییەکی فراوانتریان بۆ تەرخانکراوە.

لەدوای بنیادنانی ئەو گرتووخانانە، تورکیا لەتوانایدایە ژمارەی زیندانیکراوەکانی بەشێوەیەکی بەرچاو زیادبکات.

ئەمەش لەکاتێکدایە لە دوای کودەتا شکستخواردووەکە ژمارەی زیندانیان لەو وڵاتە نزیکەی 180 هەزار کەس بوو، تا 2019 ئەو ژمارەیە بۆ 300 هەزار زیندانیکراو بەرزبووەوە.