تاڵیبان بە خێراییەکی زۆر شارەکانی ئەفغانستان کۆنتڕۆڵدەکات

SNN

سێ شاری دیکەی ئەفغانستان کەوتنە دەست بزووتنەوەی تاڵیبان، ئەو گروپە تیرۆرستییە بە خێراییەکی زۆر ناوچەیەکی فراوانی کەوتووەتەدەست، ئەوەش لەدوای رووبەڕووبوونەوەی لەگەڵ هێزە ئەمنییەکانی ئەفغانستاندا.

دوێنێ هەریەک لە شارەکانی کوندوز، سەرپول و تاڵەقان کەوتنە دەست تاڵیبان، بەمجۆرەش لە رۆژی هەینییەوە تاڵیبان توانیویەتی پێنج شاری ئەفغانستان کۆنتڕۆڵبکات، کە پایتەختی پێنج پارێزگا بوون.

بزووتنەوەی تاڵیبان رایگەیاندووە کە هەر جۆرە ئاگربەستێک لەگەڵ حکومەتی ئەفغانستان رەتدەکەنەوە، هاوکات وتەبێژێک بەناوی بزووتنەوەی تاڵیبان کە قسەی بۆ کەناڵی جەزیرە-ی قەتەری کردووە، هۆشداریدا لە هێرشە ئاسمانییەکانی ئەمریکا بۆ سەر چەکدارەکانیان.

تاڵیبان لەدوای کۆنتڕۆڵکردنی پارێزگای تەخار، زیندانیکراوانی گرتووخانەکەی ئەو پارێزگایەی ئازادکرد.

لەلایەکی دیکەوە بە هەزاران هاووڵاتی مەدەنی لە ترسی شەڕ و بۆردومانەکان ئاوارەبوون و ئێستا لە دۆخێکی ناهەمواردا دەژین، بەشێکیان بینای قوتابخانەکانیان کردووەتە پەناگە بۆ خۆیان.