هەڵوێستی عێراق لەبارەی کشانەوەی هێزە ئاسمانييەکەی هاوپەيمانان

SNN

راوێژکاری ئاسایشی نیشتیمانی عێراق رایگەیاند: “کشانەوەی هێزی وەڵامدانەوەی خێرا کە هێزێکی تایبەتی هاوپەیمانی نێودەوڵەتی بو لەعێراق، لەچوارچێوەی ئەو رێککەوتنەدایە کە عێراق و ئەمریکا لەگفتوگۆی ستراتیژی نێوانيان بڕیاریان لەبارەوە داوە، بۆیە پێشوازی لەو هەنگاوە دەکەن”.

قاسم ئەعرەجی، راوێژکاری ئاسایشی نیشتیمانی عێراق لە تويتێکدا رايگەياندووە: “پێشوازی دەکەين لە بڕیاری هاوپەیمانی نێودەوڵەتی بۆ کشانەوەی هێزی وەڵامدانەوەی خێرا ناسراو بە OTH لەعێراق و گەڕانەوەیان بۆ بنکەی سەرەکی خۆیان لەکوەیت”.

ئاماژەی بەوەشکردووە: “بڕیارەکەی هاوپەیمانی نێودەوڵەتی بۆ شەڕی دژی داعش لەچوارچێوەی ئەو رێککەوتنەدایە کە بەغدا و واشنتن لەسەری رێککەوتون، ئەویش کشانەوەی سەرجەم هێزە شەڕکەرەکانە تا کۆتایی ئەمساڵ”.

حەوتی ئەم مانگە هاوپەیمانی نێودەوڵەتی بۆ شەڕی دژی داعش لەعێراق و سوریا رایگەیاند: “هێزی تایبەتی وەڵامدانەوەی خێرا ناسراو بە OTH کەهێزێکی ئاسمانی بوو بۆ پشتیوانی ئۆپەراسیۆنەکانی دژی داعش،  لەعێراق کشاوەتەوە و گەڕایەوە بۆ بنکەی سەرەکی خۆی لەکوەیت”.