کادرەکەی یەکێتی لە بادینان ئازادکرا

SNN-عەلی حەمەسەعید
دوای ئەوەی ماوەی شەش رۆژە لە لایەن هێزێكی ئاسایشی پارتییەوە لێپرسراوی كۆمەڵەی خوێندكارانی كوردستان لەشیلادزێ‌ دەستگیركراوە، کەمێک پێش ئێستا بە هەوڵی بەرپرسانی باڵای یەکێتی ئازادکرا و سەرجەم تۆمەتەکانی رەتدەکرێتەوە.

هەوار ئامێدی، لێپرسراوی كۆمیتەی یەكێتی نشتیمانی كوردستان لە قەزای ئامێدی بە SNNی ڕاگەیاند: دوای ئەوەی ماوەی شەش ڕۆژە (بیرهات مەهدی) لێپرسراوی كۆمەڵەی خوێندكارانی كوردستان و هاوكات ئەندام كۆمیتەی شیلادزێ لەلایەن هێزێكی ئاسایشەوە دەستگیركراوە، بەردەوام بەرپرسانی یەكێتی بەدواداچوونمان بۆ هۆكاری دەستگیركردن و چارەنوسی ئەو كادرەی یەكێتی كردووە بەڵام هیچ زانیارییەكی ئەوتۆمان پێنەدەدرا.

ئاماژەی بەوەشكرد، دوای شەش ڕۆژ لە دەستگیركردنی ئەو كادرە، بە هەوڵی بەرپرسانی باڵای یەكێتی سەر لە ئێوارەی ئەمڕۆ (بیرهات مەهدی) ئازادكراو گەڕایەوە ناو خێزانەكەی، هاوكات ئەو كادرەی یەكێتی جگە لەوەی كەسێكی چالاكە و بە كاری پیشەییی  خۆی هەستاوە هیچ تاوانێكی ئەنجام نەداوە تا دەستگیر بكرێت.

هەر ئەمڕۆ ئاراس محەمەد ئاغا، بەرپرسی مەڵبەندی بادینانی یەكێتی نشتیمانی كوردستان ئەوەی بە SNNڕاگەیاند كە ئەو تۆمەتەی  بۆ كادرە دەستگیركراوەكەی یەكێتی دروستكراوە بۆ ئەوەی دەستگیری بكەن ڕەتدەكەینەوە چونكە گوایە ئەو كادرەی ئێمە هانی خەڵكی داوە بۆ خۆپیشاندان و كاركردن لە دژی بەرژەوەندییەكانی دەوڵەت، بۆیە لەسەر ئاستی باڵا ئێمە هەوڵەكانمان بەردەوام بووە بۆ ئازادكردنی ئەو كادرەی یەكێتی لە سنوری مەڵبەندی بادینان.