روسیا لابردنی تاڵیبان لە لیستی تیرۆر تاوتوێ دەکات

SNN

وتەبێژی وەزارەتی دەرەوەی روسیا رایگەیاند ئەگەری لابردنی بزووتنەوەی تاڵیبان لە لیستی تیرۆری وڵاتەکەدا کەوتووەتەسەر کار و چالاکییەکانیان و ئەو هەنگاوانەی کە دەینێن.

ماریا زاخارۆڤا لە لێدوانێکیدا بۆ رادیۆیەکی ناوخۆیی روسیا وتی: “پرسی لابردنی تاڵیبان لە لیستی تیرۆر بەندە بە هەڵسوکەوتی ئەو بزووتنەوەیە و سیاسەتەکانی، چاوەڕێی کردارەکانیانین”.

ئاماژەی بەوەشکرد: “نێردەی روسیا بۆ ئەفغانستان و وەزیری دەرەوەی روسیا هەردووکیان گفتوگۆیان لەسەر ئەم باسە کردووە و هەمان بۆچوونیان هەیە”.

ئەمە لەکاتێکدایە لە چەند رۆژی رابردوودا حکومەتی روسیا رایگەیاند کە پەیوەندییان لەگەڵ “دەسەڵاتدارانی نوێی ئەفغانستان (تاڵیبان)” بەستووە و بارودۆخی کابول بە ئاڕاستەی سەقامگیربوون دەچێت.