نرخی نەوت بۆ نزمترین ئاستی سێ مانگی رابردوو دابەزی

SNN

نرخی نەوت لەبازاڕە جیهانیەکان بۆ نزمترین ئاستی سێ مانگی رابردوو دابەزی و هۆکارەکەشی بۆ کەمبوونەوەی خواست لەسەری دەگەڕێنرێتەوە.

دابەزینی نرخی نەوت بەردەوامە و ئەمڕۆ یەک بەرمیل نەوتی خاوی برێنت بە رێژەی 2.4٪دابەزی و بە نزیکەی 66 دۆلار و 50 سەنت مامەڵەی پێوەکرا، ئەمەش لەکاتێکدا سەرلەبەیانی و لە کاتی کردنەوەی بازاڕدا بە 67 دۆلار و 28 سەنت بوو.

هاوکات یەک بەرمیل نەوتی خاوی ئەمریکیش کە لە کاتی کردنەوەی بازاڕدا بە 64 دۆلار و 48 سەنت بوو، بە رێژەی 2.55٪ بەهاکەی دابەزیوە و لە ئێستادا بە نزیکەی 63 دۆلار و 50 سەنتە، ئەمەش کەمترین نرخە کە لە مانگی ئایارەوە تۆمار کراوە.

هۆکاری دابەزینی نرخی نەوت بۆ ئەوە دەگەڕێنرێتەوە، کە بەهۆی زیاتر تەشەنەسەندنی کۆرۆنا لە زۆربەی وڵاتان چالاکییە ئابوری و پیشەسازی و بازرگانییەکان سستیان تێکەوتوەتەوە و بەوەش جارێکی تر خواست لەسەر نەوت کەمبووەتەوە.