وەستا رەسوڵ: لەژێر فشاردا واژووی بڕیارەکەی سەرکردایەتیمان نەکردووە
SNN-عەلی حەمە سەعید
ئەندامێكی سەركردایەتی یەكێتی رەتیدەكاتەوە كە هیچ فشارێك لەسەر ئەندامانی سەركردایەتی یەكێتی كرابێت بۆ واژووكردنی بڕیارەكانی مەكتەبی سیاسی لە هەمان كاتیشدا دەڵێت ئیمە لەبەرژەوەندی یەكێتی بەدوای چارەسەرێكدا دەگەڕێین.
وەستا ڕەسوڵ، ئەندامی سەركردایەتی یەكێتی نیشتمانی كوردستان بە SNNی راگەیاند: ئێمە رۆیشتوینەتە دەباشان هەركەسەمان بە ئارەزوو و ویستی خۆمان رۆیشتوین و لەوێ ئەو کاغەزەی كە پێمان دراوە تیایدا بڕیارەكانی مەكتەبی سیاسی نوسراون هەر ئەندامێكی سەركردایەتی یەكێتی بە ویستی خۆی واژووی كردووە ئەندامی سەركردایەتیش هەبووە واژووی نەكردووە و زۆر ئاسایی بووە كەسیش لێپرسینەوە یان فشاری لەسەر دروست نەكردووە.
ئاماژەی بەوەشكرد: ئێمە بەدوای چارەسەرێكی گونجاودا دەگەڕێین بۆ ئەوەی ئەو دۆخەی ئێستا دروستبووە كۆتایی پێبهێندرێت، ئەمە دڵەڕاوكێی لای خەڵكی دروستكردووە نامانەوێت ئەو دۆخە بەو شێوازە بەردەوامی هەبێت.
وتەكانی ئەو ئەندامەی سەركردایەتی لە كاتێكدایە كە ژمارەیەك لە پەیجە سێبەرەكانی (لاهور جەنگی) ئەوەیان بڵاو كردووەتەوە كە گوایە ئەو ئەندامانەی سەركردایەتی یەكێتی واژوویان لەسەر بڕیارەكانی مەكتەبی سیاسی یەكێتی كردووە لەژێر فشاردا ئەو بڕیارانەیان واژووكردووە.
