نزیكەی هەزار و 500 مۆڵەتی ئۆتۆمبێل و 125 چەكی بێ مۆڵەت دەستیان بەسەرداگیراوە
SNN-عەلی حەمە سەعید
دوای ئەوەی لەمانگی ڕابردوودا بە فەرمانی قوباد تاڵەبانی جێگری سەرۆكی حكومەت لەپێناو ئاسایش و ئارامی زیاتر بۆ هاووڵاتیان و لە پێناو بەرژەوەندی گشتی بڕیاردرا بە دەستبەسەرداگرتنی چەكی بێمۆڵەت و ئۆتۆمبێلی بێسەرەتا، لایەنە پەیوەندیدارەكان نوێترین ئامارەكانی مەفرەزە هاوبەشەكانی پۆلیس و هێزە ئەمنییەكانیان خستەڕوو، بە جۆرێك لەماوەی مانگی رابردوودا دەستبەسەر نزیكەی هەزارو 500 بەڵگەنامەی ئۆتۆمبێل و 125 چەكدا گیراوە.
راید بەهمەن عەبدوڵا، ئەفسەر لە ڕاگەیاندنی بەڕێوەبەرایەتی هاتووچۆی پارێزگای سلێمانی بە SNNی ڕاگەیاند: ئێمە هەر لە سەرەتای دەستكردن بە هەڵمەتەكەمانەوە لە 25/7/2021 ئەوەمان ڕاگەیاندبوو كە هەڵمەتەكە بۆ ڕۆژێك و دوو ڕۆژ نییە بەڵكوو تا ئەوكاتەی دڵنیا دەبینەوە لە گەیشتن بە ئامانجەكانمان لە نەهیشتنی ئۆتۆمبێلی بێسەرەتا و چەكی بێ مۆڵەت بەردەوام دەبین، لە ئێستادا هەڵمەتەكانمان بەردەوامی هەیە و كاریگەری باشیشیان هەبووە لە زیاتر پاراستنی هێمنی و ئاسایشی سنورەكە.
ئاماژەی بەوەشكرد، لە سەرەتای هەڵمەتەكەوە تا 23ی ئەم مانگە مەفرەزە هاوبەشەكانمان لە پۆلیسی ناوخۆ و ئاسایش و پۆلیسی هاتووچۆ توانیومانە دەستبگرین بەسەر 20 ئۆتۆمبێلی بێسەرەتا و 65 ماتۆڕسكیل و هەروەها هەزار و 439 مۆڵەت و ساڵانەی ئۆتۆمبێل لە هاووڵاتییان وەرگیراوە و پسووڵەی سەرپێچییان بۆ كراوە لەگەڵ ئەوەشدا دوو هەزار و 832 ئۆتۆمبێل لەزگەی رەشی جام و پەردەیان پێوە بووە لێكراوەتەوە.
سەركەوت ئەحمەد، وتەبێژی بەڕێوەبەرایەتیی پۆلیسی پارێزگای سلێمانی بۆ SNNی روونكردەوە، هەڵمەتەكانی پۆلیس بۆ دەستبەسەرداگرتنی چەكی بێ مۆڵەت بەردەوامی هەیە لەماوەی مانگی رابردووشدا توانیومان دەستبگرین بەسەر 125 چەكی بێمۆڵەت لەو ژمارەیەش حەوت كڵاشینكۆف و 118 دەمانچەی جۆراوجۆر و دوو نارنجۆكی دەستی.
