“بکوژەکانی جوانڕۆی باڵەبان لە دەزگایەکی باڵای ئەمنی هەولێر دەوام دەکەن”

SNN

تیمى پارێزەرانى دۆسیەى کوژرانى جوانڕۆى باڵەبان ئەمڕۆ چوارشەممە رایانگەیاند: بکوژانى جوانڕۆ سەر بە دەزگایەکى ئەمنى باڵان و لەهەولێر دەوام دەکەن، بۆیە پۆلیس ئامادە نییە دەستگیریان بکات.

پارێزەرێکى دۆسیەکە ئەمڕۆ چوارشەممە لەکۆنگرەیەکى رۆژنامەنوسى هاوبەشدا لەگەڵ کەسوکارى جوانڕۆ، پۆلیسى دێگەڵەى تۆمەتبارکرد بەوەى بکوژانى جوانڕۆ دەستگیرناکات، لەکاتێکدا تەواوى ناو و ناونیشانیان رادەستکردوون.

وتیشى “دەستگیرنەکردنى تۆمەتبارەکان جێگەى گومانە، تۆمەتبارەکان سەر بە دەزگایەکى ئەمنى باڵان و لەهەولێر دەوام دەکەن”.

پارێزەرەکە ئەو دەنگۆیانەشى رەتکردەوە کە باس لەوە دەکەن جوانڕۆ لەسەر کێشەى کۆمەڵایەتى کوژرابێت و دەڵێت جوانڕۆ لەرووداوێکى زۆر گومانایدا تیرۆرکراوە.

بەرەبەیانى 22ى حوزەیرانى 2021، تەرمى هونەرمەند جوانڕۆى باڵەبان کە ئەندامى تیپی جوقی سەربازی وەزارەتی پێشمەرگە بوو لە سنورى هەولێر بەخنکێنراوى دۆزرایەوە و تائێستا هۆکارى خنکاندنى لەلایەن پۆلیسەوە ئاشکرانەکراوە.