ئەوانەی ناویان لە كۆمیسیۆنەوە بڵاوكراوەتەوە سەرجەمیان ناكرێنە كارمەندی ڕۆژی دەنگدان

SNN-عەلی حەمە سەعید

بەرپرسی ئۆفیسی سلێمانی كۆمیسیۆنی باڵای سەربەخۆی هەڵبژاردنكانی عێراق ئاماژە بەوەدەكات مەرج نییە هەموو ئەو كەسانەی كە ناوەكانیان بڵاو كراوەتەوە وەك كارمەندی كۆمیسیۆنی لە ڕۆژی دەنگدان دەستبەكار ببن، بەڵكوو تەنها پێویستیمان بە 17 هەزار كارمەند دەبێت و بە گوێرەی پێداویستی بنكەكانی دەنگدان و بەپێی ئەو ڕیزبەنییە ناوەكان دیاری دەكەین كە بۆیاندیاریكراوە.

ئامانج عەزیز، بەرپرسی ئۆفیسی سلێمانی كۆمیسیۆنی بالای سەربەخۆی هەڵبژاردنەكانی عێراق بەSNNی ڕاگەیاند: مەرج نییە هەموو ئەو ناوانەی كە لەلایەن ئۆفیسی نشتیمانی كۆمیسیۆنی باڵای سەربەخۆی هەڵبژاردنەكانەوە بڵاوكراونەتەوە وەك كارمەندی ڕۆژی دەنگدان ببنە كارمەندی كۆمیسیۆن، بەڵكو ئەو ناوانە ئەوانەن كە پێشتر فۆڕمیان پڕكردووەتەوە و مەرجەكانیان تێدایە و لەلایەن كۆمیسیۆنەوە ناوەكانیان پەسەندكراوە و هەر كەسێكیش ژمارەیەكی بۆ دیاركیراوە بە گوێرەی ڕیزبەندی.

ئاماژەی بەوەشكرد، ئێمە لە سنووری پارێزگای سلێمانی پێویستمان بە نزیكەی 17 هەزار كامەند دەبێت بەڵام زۆر لەوە زیاتر ناومان بۆ هاتووەتەوە، بۆیە ئێمە بە گوێرەی ئەو ژمارەیەی كە بۆ كەسەكان دیاریكراوە ناوەكان دیاری دەكەین و بە گوێرەی پێداویستی بنكەكانی دەنگدانیش كارمەندامان دەوێت بە نمونە ئەگەر لە بنكەیەكی دەنگدان پێویستمان بە 80 كەس هەبێت ئەوا بە گوێرەی ڕیزبەندی ناوەكان ئەو كارمەندانە دیاریدەكەین ئەو ئەوانی دیكە دەبنە كارمەندی یەدەگ.

ئەو بەرپرسەی ئۆفیسی سلێمانی كۆمیسیۆنی باڵای سەربەخۆی هەڵبژاردنەكانی عێراق ئەوەشی خستەڕوو، ئەو كەسانەی كە فۆڕمیان پێشكەش كردووە دابشدەبن بەسەر چەند جۆرێكدا بە شێوەیەك كەسانەی كە ناویان گەڕاوەتەوە و دانەمەزراون یان دەرچووی زانكۆ و پەیمانگاكانن یان كارمەندی حكومین، بۆیە ئێمە لەسەرەتادا بەناوی دامەزراوەكان دەستپێدەكەین پاشان دەرچووانی زانكۆو پەیمانگاكان دواتریش خوێندكاران ئەوەش پشت بەستن بە پسپۆڕی ئەو كەسانەی كە فۆِمیان پڕكردووەتەوە.