بافڵ تاڵەبانی قەرەبووی ئەو خێزانانەی خورماتوو دەکاتەوە کە لەدوای 16ی ئۆکتۆبەر زەرەرمەندبوون

SNN

بافڵ تاڵەبانی یەک ملیۆن دۆلار تەرخان دەکات بۆ نۆژەنکردنەوەو قەرەبووکردنەوەی ئەو ماڵەکوردانەی خورماتوو کە لەدوای رووداوەکانی ١٦ ئۆکتۆبەرەوە خانووەکانیان لەلایەن نەیارانی کوردەو سووتاون و رووخێنراون .

مەلا کەریم شکور لێپرسراوی مەڵبەندی رێکخستنی حەمرینی یەکێتیی نیشتمانیی کوردستان لە لێدوانێکی رۆژنامەوانیدا رایگەیاند لەکاتی سەردانەکەی
بافڵ تاڵەبانی بۆ شاری کەرکوک دوای ئەوەی داواکاری و داخوازییەکانی خەڵکی خورماتوومان خستە بەردەمی، راستەوخۆ بڕیاریدا یەک ملیۆن دۆلار بە ( 10) قۆناغ تەرخانبکرێت بۆ نۆژەنکردنەوەی ماڵی ئەو خانەوادە کوردانەی کە ماڵەکانیان سوتێنراون یاخود روخێنرابوون یان زیانیان بەرکەوتووە بەھۆی دەرئەنجامەکانی ریفراندۆم و رووداوەکانی 16 ئۆکتۆبەر .
لێپرسراوی مەڵبەندی حەمرین روونیشیکردەوە لەچوارچێوەی ئەم بڕیارە گرنگەی ھاوسەرۆک لیژنەیەک پێکھێنراوە بۆ دەست پێکردنی کاروبارەکان، و ئاشکراشیکرد ھەر لەکۆبوونەوەکەماندا لەگەڵ بافڵ تاڵەبانی کێشەی موچە دزراوەکانی مامۆستایانی بەشی خوێندنی کوردی خورماتوو مان خستەبەردەمی و بڕیاریدا قەرەبوو بکرێنەوە و لەو چوارچێوەیەشدا ئەمڕۆ لە مەراسیمێکدا ھەر 88 مامۆستاکە قەرەبووکرانەوە و بڕی ئەو پارەیە کە لەلایەن ھاوسەرۆکەوە تەرخانکرابوو دابەشکرا بەسەریاندا .

مەلا کەریم شکور لەلێدوانەکەیدا ئاماژەی بۆئەوەشکرد ئەم ھەنگاوانە لەمیانی گرنگی پێدانی یەکێتی دێت بۆ ناوچەی خورماتوو ، بەتایبەت بافڵ تاڵەبانی ھاوسەرۆکی یەکێتی خزمەتکردنی کەرکووک و خورماتوو و ناوچەی گەرمیان بە ئەولەویەتی کارەکانی داناوەو لەکۆبوونەوەکەماندا لەگەڵی تەئکیدیکردەوە کە یەکێتی بە ئەرکی خۆی دەزانیت خزمەتی خەڵکی تێکۆشەرو قوربانی بەخشی ئەو سنورانە بکات چونکە گەرمیانییەکان خاوەنی راستەقینەی یەکێتین .