جارێکی دیکە دادگایکردنی گیراوانی بادینان دواخرا
SNN
ئەمڕۆ چوارشەممە، جارێکی دیکە بەهۆی ئامادە نەبوونی دادوەرەکانی دۆسیەکەوە، دادگای کردنی گیراوانی بادینان دواخرا و عەلی حەمە ساڵح لە لاپەرەی فەیسبووکی تایبەتی خۆی هەواڵی دواخستنی دادگای گیراوانی بادینان پشتراست دەکاتەوە.
ئەمەش لە کاتێکدایە بڕیاربوو رۆژی دووشەممە دانیشتنی دادگایی کردنی چوار چالاکوانی تر بە ناوەکانی مەسعود عەلی، شیروان تەها ئەمین، بەندەوار رەشید و كارگەر عەباس بەڕێوەبچێت، بەڵام بەهۆی گواستنەوەی دوو دادوەرەوە دادگاییكردنەكە دواخرا.
زیاتر لە ساڵێکە بەدەیان چالاکوان و رۆژنامەنووسی بادینان لەلایەن دەزگا ئەمنییەکانی هەولێر و دهۆکەوە بە چەند تۆمەتێک دەستگیرکراون، دواتریش دادگای پێداچوونەوەی هەولێر بڕیاری سزای شەش ساڵ زیندانیکردنی بۆ پێنج لەو دەستگیرکراوانە دەرکرد، سەرباری رەخنەکانیش لە بڕیارەکە، بەڵام دواجار دادگا بڕیارەکەی پەسەند کرد.
گرتن و سزادانی چالاکوانان و رۆژنامەنووسانی بادینان لەسەر ئاستی ناوخۆ و دەرەوەی هەرێمی کوردستان کاردانەوە و ناڕەزایەتی زۆری لێکەوتوەتەوە و بە هەوڵێک بۆ بەکارهێنانی دادگا لە پێناو سەرکوتی رەخنەگران و بەرتەسککردنەوە ئازادی رادەربڕین لێکدراوەتەوە.
