لەم هەفتەیەدا 11 چالاكوانی بادینان دادگایی دەكرێن

SNN-عەلی حەمە سەعید
سەرۆكی تیمی پارێزەرانی دەستگیركراوانی بادینان ئاماژە بەوەدەكات لە ئەمڕۆوە هەتا 21 ی ئەم مانگە پرۆسەی دادگایكردنی 11 دەستگیركراوی بادینان بەڕێوە دەچێت و ئەمڕۆش دادگایكردنی مامۆستا بەدەل بەرواری و ئومێد بەرۆشكی بەڕێوەدەچێت و سبەی چوارشەممەش دادگایكردنی هەریەكە لە شیروان تەها ئەمین، مەسعود عەلی، كارگەر عەباس و بندەوار ئەیوب بەڕێوەدەچێت.

بەشدار حەسەن، سەرۆكی تیمی پارێزەرانی دەستگیركراوانی بادینان بە SNNی ڕاگەیاند: جارێكی دیكە پرۆسەی دادگایكردنی ژمارەیەك لە دەستگیركراوانی بادینان دەستپێكردووەتەوە و ئەمڕۆ دادگایكردنی مامۆستا بەدەل بەرواری و ئومێد بەرۆشكی بەڕێوە دەچێت و سبەی چوارشەممەش دادگایكردنی هەریەكە لە شیروان تەها ئەمین، مەسعود عەلی، كارگەر عەباس و بندەوار ئەیوب بەڕێوەدەچێت.

ئاماژەی بەوەشكرد، هەر لەم هەفتەیەدا و لە رۆژی پێنجشەممە 21/10/2021 هەریەكە لە (سلێمان كەمال، سلێمان موسا، فرسەت ئەحمەد، عامر خالید و جەمال خەلیل) دادگاییكردنەكەیان بەڕێوەدەچێت، لەكاتێكدا بۆ ماوەی چەندین جارە بە بیانوی جیاجیاوە دادگاییكردنی دەستگیركراوانی بادینان بۆ كاتی دیكە دوادەخرێت و ئەمەش، ناڕەزایەتی كەسوكاری دەستگیركراوان و چاودێرانی بواری مافەكانی مرۆڤی بەدوای خۆیدا هێناوە.

ماوەی زیاتر لە ساڵێكە 70 چالاكوان و رۆژنامەنووسی بادینان بە چەند تۆمەتێك دەستگیركراون، دواتریش دادگای پێداچوونەوەی هەولێر بڕیاری سزای شەش ساڵ زیندانیكردنی بۆ پێنج لەو دەستگیركراوانە دەركرد و تا ئێستاش چەندین جار بە بیانووی جۆراو جۆر پرۆسەی دادگایكردنی ئەو دەستگیركراوانە دواخراوە.