لەسەر گرانبوونی سووتەمەنی داوا دەکرێت وەزيری سامانەسروشتييەکان بچێتە پەرلەمان

SNN

بەمەبەستی پێدانی روونکردنەوە لەسەر هۆکارەکانی گرانبونی سوتەمەنی، ژمارەی یاسایی ئەندامانی پەرلەمانی کوردستان داوای دانیشتنێکی پەرلەمان دەکەن بەئامادەبونی وەزیری سامانە سروشتییەکان.

لەیاداشتێکی هاوبەشدا کە ئاڕاستەی سەرۆکایەتی پەرلەمانی کوردستانیان کردووە، 24 ئەندامی پەرلەمانی کوردستان داوایان کردووە دانیشتنێکی تایبەت ڕێکبخرێت بەئامادەبونی وەزیری سامانە سروشتیەکان بۆ گفتوگۆکردن سەبارەت بە قەیرانی سوتەمەنی وگرانبونی نرخی بەنزین، غاز، نەوتی سپی و دابەشنەکردنی بەرمیلێک نەوتی ساڵانە بەسەرهاوڵاتیاندا”.

ئەمە لەکاتێکدايە ئه‌مڕۆ سێشه‌ممه‌، جارێكی دیكه‌ نرخی به‌نزین له‌ به‌نزینخانه‌كان به‌رزبونه‌وه‌ی به‌خۆوه‌ بینی و لیترێك به‌نزینی سۆپه‌ر گه‌یشته‌ 1300 دینار.

دوێنێش، كه‌مال ئه‌تروشی، وه‌زیری سامانه‌ سروشتییه‌كانی حكومه‌تی هه‌رێم رایگه‌یاند: سه‌ردانی به‌غدامان كردوه‌ و له‌گه‌ڵ وه‌زاره‌تی نه‌وتی عێراق رێكه‌وتوین كه‌ رۆژانه‌ بڕی یه‌ك ملیۆن و 80 هه‌زار لیتر به‌نزین ره‌وانه‌ی هه‌رێمی كوردستان بكرێت و له‌ چه‌ند رۆژی داهاتودا به‌نزین ده‌گاته‌ هه‌رێمی كوردستان و نرخه‌كه‌ی هه‌رزان ده‌بێت.