وەزارەتی بازرگانی رێگەچارەکانی دابەزاندنی نرخی ئاردی ئاشکراکرد

SNN

ئەمڕۆ سێشەممە، محمەد حەنون، وتەبێژی وەزارەتی بازرگانی عێراق بە ئاژانسی فەرمی ھەواڵی عێراقی راگەیاند: “کە چەند رێگەچارەیەکیان خستووەتە بەردەم مستەفا کازمی، سەرۆک وەزیرانی عێراق، سەبارەت بە ھۆکاریی گرانبوون و بەرزبوونەوەی نرخی ئارد لە ئێستادا.

حەنون، ئاماژەی بەوەشدا، وەزارەتی بازرگانی لیژنەیەک پێکدەھێنێت بەمەبەستی چاودێریکردنی نانەواخانە و سەمونخانەکان، هەروەها فەرمانگەی چاودێریکردنی بازرگانی لە وەزارەتی بازرگانی و خودی وەزارەتەکەش لیژنەیەکیان پێکھێناوە بۆ لێکۆڵینەوە و بەدواداچوون لە بازار و بەرزبوونەوەی نرخی ئارد، هەروەها وەزارەتی بازرگانی گوژمەی نۆیەمی ئاردی ئامادەکردووە تایبەت بە بەشەخۆراکی ھاووڵاتییان لە تەواوی عێراقدا.

لەبارەی بەرزبوونەوەی نرخی ئاردەوە وتەبێژی وەزارەتی بازرگانی دەشڵێت، بەرزبوونەوەی نرخی ئارد پەیوەندی نییە بە ھەبوونی لە لیستی بەشەخۆراکدا، بەڵکو پەیوەندی ھەیە بە بەرزبوونەوەی نرخی ئاردی سفری ھاوردەکراو، کە وەزارەتی بازرگانی لە ھێنانی بەرپرس نییە، بەوپێیەی ھاوردەکردنی ئاردی سفر لە رێگەی نانەواخانە و سەموونخانەکان و بازاری ناوخۆییەوە ئەنجامدەدرێت.