گفتوگۆکانی مێرکڵ و پوتین لەسەر کۆچبەرانی بێلاڕوسیا بەردەوامە

SNN

ئەمڕۆ بۆ دووەم رۆژ لەسەریەک ئەنگێلا مێرکڵ راوێژکاری ئەڵمانیا و ڤلادمیر پوتین سەرۆکی روسیا گفتوگۆیان لەبارەی پرسی کۆچبەرانی سنووری بێلاڕوسیا و پۆڵەندا کرد بەمەبەستی دۆزینەوەی رێگاچارەیەک.

کریملین بڵاویکردەوە، ئەمڕۆ پێنجشەممە پوتین و مێرکڵ بەتەلەفۆن قسەیان کردووە و جەختیان لە گرنگی دۆزینەوەی رێگاچارەیەکی بەپەلە کردووەتەوە بۆ یەو قەیرانی کۆچەی کە لەسەر سنووری بێلاڕوسیا دروستبووە”.

پوتین وتوویەتی کە دەبێت گفتوگۆکانی نێوان بێلاڕوسیا و وڵاتانی یەکێتی ئەوروپا بەردەوامی پێبدرێت بەمەبەستی چارەسەرکردنی بارودۆخەکە.

ئەمە لەکاتێکدایە دوێنێ مێرکڵ لە پەیوەندییەکی تەلەفۆنیدا داوای لە پوتین کرد نێوەندگری بکات و فشاربخاتەسەر حکومەتەکەی مینسک بەمەبەستی چارەسەرکردنی قەیرانی کۆچبەران.

لە ئێستادا زیاتر لە چوار هەزار کۆچبەر، کە بە خەملێندراوی سێ هەزاریان خەڵکی هەرێمی کوردستانن، لە سنووری نێوان بێلاڕوسیا و پۆڵەندا ماونەتەوە بە ئامانجی گەیشتن بە وڵاتانی ئەوروپا.