“حكومەت بودجە بۆ تەواوكردنی ئۆتۆبانی بابان خەرجناكات”
شارێی بابان لە سلێمانی
SNN-عەلی حەسەعید
ئەندامێكی لیژنەی پلان و پڕۆژەكان لە ئەنجومەنی پارێزگای سلێمانی ئاماژە بەوەدەكات لە بەدواداچوونمان بۆ تەواوكردنی پرۆژەی ئۆتۆبانی بابان كە بەشەقامی 100 مەتری ناسراوە ئەوە دەركەوتووە كە حكومەت بودجەی پێویستی بۆ تەواوكردنی پرۆژەكە خەرج نەكردووە، هاوكات هێشتا بەشێك لە گرفتی زیادەڕۆیی چارەسەر نەكراون، بۆیە لە حاڵەتی دەركەوتنی لایەنی كەمتەرخەم ڕووبەڕووی دادگایان دەكەینەوە.
خەدیجە عەبدولجەبار، ئەندامی لیژنەی پلان و پرۆژەكان لە ئەنجومەنی پارێزگای سلێمانی بە SNNی ڕاگەیاند: بەمەبەستی بەدواداچوون بۆ كارەكانی تەواوكردنی پرۆژەی ئۆتۆبانی بابان كە بە شەقامی 100 مەتری سلێمانی ناسراوە ژمارەیەك لە ئەندامانی ئەنجومەنی پارێزگای سلێمانی بە شێوەیەكی مەیدانی سەردانی پرۆژەكەمان كردووە بۆمان دەركەوتووە كە حكومەت بڕی پێویستی بودجەی بۆ تەواوكردنی پرۆژەكە تەرخان نەكردووە هەر ئەوەش وایكردووە كە كارەكانی پرۆژەكە بە سستی بەڕێوە بچێت.
ئاماژەی بەوەشكرد، ئێمە بۆ بەدواداچوونی لایەنی قەربووكردنەوەی جوتیاران و خاوەن زەوییەكانی سنورەكە لەگەڵ بەڕێوەبەرایەتی گشتی كشتوكاڵی سلێمانیش دانیشتنمان كردووە بەڵام بۆمان دەركەوتووە زیاد لە ساڵێكە هێشتا بابەتی قەرەبووكردنەوەی خاوەن زەوی و جوتیارانی ئەو سنوورە هێشتا تەواو نەبوون، هاوكات بابەتی زیادەڕۆیی بۆسەر پرۆژەكە بەتایبەت لەناوچەی تانجەرۆ هۆكارێكی دیكەیە كە پرۆژەكە رووبەڕووی گرفت ببێتەوە.
ئەو ئەندامەی لیژنەی پلان و پرۆژەكان لە ئەنجومەنی پارێزگای سلێمانی ئەوەشی خستەڕوو، ئەگەر بەزوترین كات حكومەت بودجەی پێویست بۆ تەواوكردنی پڕۆژەكە خەرج نەكات ئەوا پرۆكە ڕووبەڕووی مەترسی تەواونەكردن دەبێتەوە بۆیە ئێمە لە بەدواداچوونەكانمان بەردەوام دەبین و لەڕۆژانی داهاتوو سەرجەم لایەنە پەیوەندیدارەكان لە ئەنجومەنی پارێزگای سلێمانی كۆدەكەینەوە وهەوڵی چارەسەركردنی كێشەكانی بەردەم پڕۆژەكە دەدەین و لە حاڵەتی دەركەوتنی لایەنی كەمتەرخەم رووبەڕووی دادگایان دەكەینەوە.
