SNN
بەرپرسی فەرمانگەی پەيوەندييەکانی دەرەوەی حکومەتی هەرێم رايگەياند: وەزیرێکی ئەڵمانی بەفەرمی پێی وتین وەرگرتنی 2000 کۆچبەر لەلایەن ئەڵمانیەوە هیچ بنەمایەکی ڕاستی نیە.
سەفين دزەيی بەرپرسی فەرمانگەی پەیوەندییەکانی دەرەوەی حکومەتی هەرێم بە دەنگی ئەمريکای راگەياندووە: لە دوو ڕۆژی ڕابردوو، لە میانەی کۆنگرەکەی مەنامە وەزیرێکی ئەڵمانیامان بە فەرمی بینی و بابەتی وەرگرتنی کۆچبەرانمان لەگەڵ باسکرد، وەزیرە ئەڵمانیەکە زۆر بە فەرمی ئەو هەواڵەی ڕەتکردەوە و وتی هیچ بنەمایەکی ڕاستی نیە”.
سەفين دزەيی وتيشی “لە چەند ڕۆژی ڕابردوو 431 بەوشێوەیە گەڕانەوە، تا ئێستاش ناونوسین بەردەوامە کۆتا جاریش کە زانیاریمان وەرگرت لە باڵوێزخانەی عێراق لە مۆسکۆ کە تیمێکی ترییان ڕەوانەی مینسک کردووە نزیکەی 500 کەسی تر خۆیان ناونوس کردووە”.
دەشڵێت “ئێمە لە گەڵ لایەنەکانی ئەوروپی دەمێکە باسی ئەوە دەکەین، ئەگەر بیانەوێت خەڵک ڕووییان تێ نەکات پێویستە هاوکاری هەرێمی کوردستان بکەن لە کۆمەڵێک بواردا، مەسەلەی ئابورییە، پێشکەوتنی کۆمەڵگایە، هەروەها بابەتی ئاسایشە تا خەڵک دووچاری دڵەڕاوکێ نەبێت، وە کۆمەڵێک شتی تریش هەیە دەتوانن هاوکارمان بن تا خەڵک بیر لە چوونە دەرەوە نەکاتەوە، بەڵام لە هەمانکاتدا خەڵک خاوەنی بڕیاری خۆیەتی و بەپێی جاڕنامەی نەتەوە یەکگرتووەکان هەموو کەس ئازادە لە سەفەرکردن”.
سەبارەت بە تۆڕی قاچاخچييەکانيش لە عێراق دەڵێت “ئەو تۆڕە قاچاغچیەی هەیە، هەوڵی قۆستنەوەی دەرفەتەکانی داوە، بەڵام پاش ئەوەی حکومەتی عێراقی بڕیاری داخستنی کونسڵیەی فەخری لە بەغداد و هەولێر دا، ئەو تۆڕە قاچاخچیە پاسپۆڕتی هاووڵاتیەکانیان کۆدەکردەوە و دەیانبردە وڵاتانی دراوسێ بۆ وەرگرتنی ڤیزا، یاخود بە ڕێگای ترانزەیت لە ڕێگای ئیماراتەوە کۆچیان دەکرد.
باسی لەوەشکرد: هەوڵەکانی وەزارەتی ناوخۆ بەردەوام بوو بۆ دەستنیشانکردنی بەشێک لەو تۆڕەی کە لەهەرێمی کوردستانن بەردەوام بوو، وە هەوڵێک لە ئارادایە لە نێوان هەولێر و بەغداد تا ئەو کەسانە دەستگیر بکرێن کە بە قاچاغ خەڵک دەبەنە وڵاتان، وە هەندێکیشیان دەستگیرکراون تا ئێستا لە هەرێمی کوردستان.
