جۆرج قەرداحی دەستلەکاردەکێشێتەوە

SNN

جۆرج قەرداحی وەزیری راگەیاندنی لوبنان، کە بەهۆی لێدوانێکیەوە ناکۆکی لەنێوان لوبنان و سعودیە دروستکردووە، بڕیاریداوە ئەمڕۆ هەینی دەستلەکاربکێشێتەوە.
قەرداحی رایگەیاندووە کاتژمێر یەکی پاشنیوەڕۆی ئەمڕۆ بەکاتی ناوخۆی لوبنان، بە فەرمی دەستلەکارکێشانەوەی خۆی رادەگەیەنێت بە ئومێدی ئەوەی بەهۆی ئەوەوە ناکۆکییەکانی نێوان وڵاتەکەی و سعودیە کۆتاییان پێبێت.
ناوبراو وتوویەتی: “لە سەرەتای دروستبوونی ئەو ناکۆکیەوە وتوومە کە ئەگەر بە دەستلەکارکێشانەوەم کێشەکان چارەسەر دەبن ئەوا من ئامادەم دەستلەکاربکێشمەوە”.
لە کۆتایی مانگی تشرینی یەکەم قەرداحی لە چاوپێکەوتنێکیدا وتبووی: “حوسییەکان کە لەلایەن ئێرانەوە پشتگیریدەکرێن، دژی دوژمنکارانی دەرەکی بەرگری لەخۆیان دەکەن‌و هاوپەیمانییەکەی سعودیەش ماڵ، گوند، پرسەو زەماوەند بۆردومان دەکات”.
ئەم لێدوانە قەیرانی دیپلۆماسی لەنێوان لوبنان و سعودیە و ئیمارات دروستکرد.