یەکەم حاڵەتی تووشبوون بە ئۆمیكرۆن لە تونس تۆمارکرا

SNN

وەزيری تەندروستی تونس رايگەياند: “يەکەم حاڵەتی تووشبوون بە ڤايرۆسی کۆرۆنا لە جۆری ئۆميکرۆن لەو وڵاتە تۆمارکراوە، تووشبووەکە تەمەنی 23 ساڵە”.

عەلی مواربت وەزیری تەندروستی تونس، لە لێدوانێکيدا بۆ ميدياکانی وڵاتەکەی رايگەياند: “گەشتیارێکی تەمەن 23 ساڵ کە لە کۆماری کۆنگۆی دیموکراتەوە ھاتووەتە تونس، دوای پشکنین دەرکەوتووە ھەڵگری جۆری ئۆمیکرۆنی ڤایرۆسی کۆرۆنایە”.

وەزیری تەندروستی تونس، ئەوەشی ئاشکرا کرد: کە لە ئێستادا توشبووەکە لە شوێنێکی تایبەت کەرەنتین کراوە.

بەگوێرەی راگەیەندراوە فەرمییەکان، تا ئێستا لە تونس بەھۆی پەتای کۆرۆنا 25 ھەزار و 328 کەس گیانیان لەدەستداوە و 717 ھەزار و 908 حاڵەتی توشبوونیش تۆمار کراون.

لە کۆی دانیشتوانی 12 ملیۆنی تونس، تا ئێستا چوار ملیۆن و 22 ھەزار و 471 کەس دوو دۆزی ڤاکسینیان وەرگرتووە.