جەبار ياوەر: ئەگەر عێراق ڕەزامەند بێت دەتوانین کێوماڵی ئەو ناوچانە بکەین کە داعشی لێیە

SNN

ئەمينداری گشتی وەزارەتی پێشمەرگە رايگەياند: “ئەگەر حکومەتی عێراق ڕەزامەند بێت دەتوانین کێوماڵی ئەو ناوچانە بکەین کە داعشی لێیە، لەبەرئەوەی ئەو ناوچانە ناوچەی جێناکۆکن، پێشتر هێزی کوردستانی لێبووە”.

فەریق ڕوکن جەبار یاوەر ئەمینداری گشتی وەزارەتی پێشمەرگە بە دەنگی ئەمريکای راگەياندووە: “لە سەردەمی بەڕێز (عەبادی) پێشمەرگە لە ناوچە جێناکۆکەکان کشانەوە تا شەڕێکی خوێناوی گەورە دروست نەبێت، بێگومان ئێستا ئەو ناوچانە بۆشایین ناتوانین هیچ چالاکیەکی سەربازی لەو ناوچانە ئەنجام بدەین”.

دەشڵێت “ئێستا ئێمە هەوڵ دەدەین بۆ ئەوەی بەهاوبەشی لەگەڵ عێراق بچین کۆتایی بە بونی داعش بهێنین لەو ناوچانە، بۆیە لە دوای کشانەوەی پێشمەرگە لە ناوچەکانی کەرکوک، دیالە، هەولێر، موسڵ، سەڵاحەدین، بۆشایی دروست بوو، هێزەکانی عێراق توانای پڕکردنەوەی ئەو بۆشاییەیان نیە، هەروەها توانای کۆنترۆڵکردنیان نیە، بەهۆی ئەوەی ئەو هێزانە جۆراو جۆرن، جگە لەوەی شارەزای جوگرافیای ناوچەکەیان نین، لەبەر ئەوەیە هەوڵدەدەین بە هاوبەشی ئەو کارە سەربازییانە پێکەوە ئەنجام بدەین دژی داعش لەو ناوچانە”.

وتيشی “هۆکاری ئەوەی داعش لەم ماوەیەدا هاتووە ڕووی لە هێزەکانی پێشمەرگە کردووە بۆ ئەوە دەگەڕێتەوە کە هێزەکانی عێراق لەم ماوەیەدا کۆمەڵێک ئۆپراسیۆنی گەورە (کێوماڵکردنێکی) گەورەی لە پارێزگاکانی دیالە و سەڵاحەدین و موسڵ ئەنجامدا، لەبەر ئەوە ئەو تیرۆریستانە دوورکەوتنەوە لەو ناوچانەی عێراق هاتونەتە ئەمبەر پەلاماری هێزی پێشمەرگەی کوردستان دەدەن، وە ئەو هەلەشیان قۆستۆتەوە کە هێشتا حکومەتی نوێی عێراق دانەمەزراوە و کێشە لەنێوان لایەنە سیاسیەکاندا هەیە ئەوان دەیانەوێت ئەوە بقۆزنەوە و خۆیان پیشان بدەن کە ئەوان هەن”.

جەبار یاوەر ئامەژەی بەوەکردووە: ئێمە میکانیزمەکانی خۆمان پەیڕەوکردووە بۆ ڕوبەڕووبونەوەی داعش، یەکەم هەفتەی پێشوو بەسەرۆکایەتی بەڕێز وەزیری پێشمەرگە کۆبونەوەیەکمان کرد، بە ئامادەبوونی هەموو ئەو لیوایانەی لەو هێڵانە دابەشبوون، ئاگاداری کردن کە دەبێت لەم ماوەیەدا زۆر وریا بن، بەردەوام لە ئەرکدا بن جگە لەوەی گوێمان لێگرتن لەو کۆبونەوەیەدا سەبارەت بە پێویستییەکانیان، هاوکات فەرمانێک دەرچوو کە لیژنەیەکی هاوبەش دروست بکرێت ئەم هەفتەیە ئەو لیژنەیە دەڕوات بۆ هێڵەکانی بەرگری هەرچی پێویست بێت لە ڕێگا و بان و پێداویستی و کامێرای چاودێری حەراری هەموو پێداویستییەکانی تریان بۆ دابین بکرێت بۆ ئامادە باشی ئەو هێزانە، وە ئاڕاستەی دووەم ئەوەیە لەگەڵ حکومەتی ناوەندی عێراق کاری هاوبەش بکەین بۆ ڕووبەڕووبونەوەی تیرۆریستانی داعش”.