دوو جۆری گەنم بە ناوی شارێکی هەرێمی کوردستانەوە ناودەنرێن

SNN

لیژنەی نیشتیمانی بۆ تۆمارکردن و پاراستنی جۆرە کشتوکاڵییەکانی عێراق دوو جۆری گەنمی بە ناوی شارێکی هەرێمی کوردستانەوە ناوناوە.

لەوبارەوە یادگار مەحمود جێگری سەرۆکی زانکۆی گەرمیان لە هەژماری خۆی لە فەیسبووک بڵاویکردەوە، لیژنەی نیشتیمانی بۆ تۆمارکردن و پاراستنی جۆرە کشتوکاڵییەکانی عێراق بە فەرمیی دوو جۆری نوێی گەنمی بەناوەکانی “کەلار 1- کەلار 2” پەسەندکردووە.

باسی لەوەشکردووە، “گەشەپێدانی جۆری نوێی کشتوکاڵی بەتایبەت گەنم و تایبەت تر لە گەرمیان پێویستییەکی حەتمی و هەنگاوێکە بۆ زیادکردنی بەرهەمە کشتوکاڵییەکانی جوتیاران و پاراستنی ئاسایشی خۆراک”.

یادگار مەحمود راشیگەیاندوە، پەسەندکردنی ئەو دوو جۆرە گەنمە بەهۆی هەوڵەکانی بەڕێوەبەرایەتی توێژینەوەی کشتوکاڵی گەرمیان بووە، کە لەماوەی چوار ساڵی رابردوودا کاری لەسەکراوە و لەئەنجامیشدا دەرکەوت، “کە بەرهەمیان بەرێژەی 50٪ زیاترە”.

جێگری سەرۆکی زانکۆی گەرمیان ئەوەشی خستووەتەڕوو، “گەرمیان وەک ناوچەیەکی نیمچە وشک، تێکڕای بارانی ساڵانەی بریتی بووە لە (318ملم) لە ماوەی نێوان ساڵانی (2000-2019)، هاوکات ڕووبەرێکی فراوانی زەوی کشتوکاڵی لەخۆدەگرێت کە زۆرینەی هەرەزۆری پشت بەباران دەبەستێت بۆ کشتوکاڵ.”