ئاسايشی سلێمانی لەسەر شەڕەتەقەکەی ئەمشەو روونکردنەوە دەدات
SNN
وتەبێژی ئاسایشی سلێمانی راگەیاند: ئێوارەی ئەمڕۆ رووبەڕووبوونەوەیەک لەنێوان هێزەکانی ئاسایشی سلێمانی و سێ داواکراوی عەرەب روویدا و بەهۆیەوەیە یەکێک لە داواکراوەکان برینداربوو و ئێستا لە نەخۆشخانەیە.
یاسین سەمیع، وتەبێژی ئاسایشی سلێمانی لە لێدوانێکدا راگەیاندووە: “هێزەکانمان چوونەتە گەڕەکی راپەڕین بۆ دەستگیرکردنی سێ تۆمەتبار کە فەرمانی دەستگیرکردنیان هەبووە، بەڵام لە کاتی دەستگیرکردنیان رووبەڕووی هێزەکانی ئاسایش بوونەتەوە و تەقەیان کردووە، لە ئەنجامدا هێزەکانی ئاسایش وەڵامی داواکراوەکانیان داوەتەوە و بەهۆیەوە یەکێک لە داواکراوەکان برینداربووە.”
وتەبێژی پۆلیسی سلێمانی ئاماژە بەوە دەدات: کە هەر سێ داواکراوەکە عەرەبن، بەڵام ئاماژەی بەوە نەدا کە لەسەر چ تۆمەتێک فەرمانی دەستگیرکردنیان بۆ دەرچووە و دەشڵێت “لە چەند رۆژی داهاتوودا وردەکاری تۆمەتەکانیان دەخرێتەڕوو.”
بەوتەی یاسین سەمیع دوو تۆمەتبارەکەی دیکە دوای رووداوەکە لەلایەن هێزەکانی ئاسایش دەستگیرکراون و ئەو تۆمەتبارەیشی برینداربووە لەژێر چاودێریی ئاسایش و هێزە ئەمنییەکان لە نەخۆشخانە چارەسەر وەردەگرێت.
