تەندروستی هەولێر: هەر نەخۆشێک خۆی نەکوتیبێت رێگەی پێنادرێت بچێتە نەخۆشخانە
SNN
بەڕێوەبەری گشتی تەندروستی هەولێر رایگەیاند: لە یەکی شوباتەوە، هەر کەسێک ئەگەر بە ڤاکسینی کۆرۆنا خۆی نەکوتیبێت رێگەی پێنادرێت بچێتە نەخۆشخانەکانەوە، بەڵام ئەم بڕیارە حاڵەتەکانی فریاکەوتن ناگرێتەوە.
د. دلۆڤان محەمەد ئاماژەی بەوەکرد: ئەم بڕیارە پزیشک و کارمەندانی تەندروستی سنووری بەڕێوەبەرایەتی گشتی تەندروستی هەولێریش دەگرێتەوە، هەروەها هاووڵاتیان و نەخۆشانیش دەگرێتەوە کە سەردانی بنکەکانی تەندروستی دەکەن، کە لە سەرەتای مانگی داهاتووەوە ئەگەر خۆیان نەکوتیبێت رێگەیان پێنادرێت بچنە بنکەکانی تەندروستی و نەخۆشخانەکان.
وتیشی: “ئەگەر ئەو کەسانەی ڤاکسینی کۆرۆنایان وەرنەگرتووە، دەبێت پشکنینی کۆرۆنای هەفتانەیان هەبێت ئینجا دەتوانن بچنە نەخۆشخانەکانەوە و بەپێی یاسای تەندروستی مامەڵەیان لەگەلدا دەکەین”.
د. دلۆڤان وتی: “لە سنووری پارێزگای هەولێر بە نزیکەیی لەسەدا 20ی هاووڵاتیان دوو ژەمە ڤاکسینیان وەرگرتووە کە ئەوە رێژەیەکی کەمە”.
