یاسای هەڵبژاردنەكانی هەرێم كەموكورتی زۆری تیدایە و دەبێت هەموار بكرێتەوە

SNN-عەلی حەمە سەعید

ئەندامێكی فراكسیۆنی یەكێتی لە پەرلەمانی كوردستان ئاماژە بەوەدەكات یاسای هەڵبژاردنی هەرێمی كوردستان كەموكورتی زۆری تێدایە و لەگەڵ گەشەسەندنی سیاسی و دیموكراسی ئێستای هەرێم ناگونجێت و دەبێت هەموار بكرێتەوە ئەوەش لەپێناو رەخساندنی كەشێكی لەبار بۆ هەلبژاردن و دوور لە هەر ساختەكارییەك و هاووڵاتیان بتوانن بە بەئازادانە دەنگی خۆیان بدەن.

لوقمان وەردی، ئەندامی پەرلەمانی كوردستان لە فراكسیۆنی یەكێتی بە SNNی ڕاگەیاند: یاسای ژمارەی 1ـی هەڵبژاردنی پەرلەمانی كوردستان، كەمكوڕی زۆری تێدایە، بەشێوەیەك ئەم یاسایە لە ئێستادا لەگەڵ ئاستی گەشەسەندنی سیاسی و دیموكراسی و كۆمەڵایەتی هەرێمی كوردستاندا ناگونجێیت، بۆیە لەپێناو دەستەبەركردنی زەمینەیەكی لەباردا بۆ ھەڵبژاردنێكی ئازاد و پاكوبێگەرد، هەروەها مسۆگەركردنی نوێنەرایەتی ڕاستەقینەی جوگرافی پارێزگاكان، پێویستە بەرلەوەی قسەوباس لەبارەی كاراكردنەوەی كۆمسیۆنی ھەڵبژاردن و راپرسی بكرێت، یاسای ھەڵبژاردن ھەمواربكرێتەوە

ئاماژەی بەوەشكرد، كۆمیسیۆنی سەربەخۆی هەڵبژاردن و ڕاپرسی لەهەرێم، تاكە دامەزراوەی نیشتمانییە، كە حزبێكی دیاریكراوی تێدا باڵادەست نییە، بەڵكو پێكهاتەكەی ڕەنگدانەوەی نوێنەرایەتی زۆرینەی هێزە سیاسییەكانی كوردستانە، بۆیە دەبێت پێكهاتەی ئیستای كۆمسیۆنەكە بەمجۆرەی ئێستا بمێنێتەوە و ڕێگانەدرێت هەژموونی هیچ هێز و لایەنێكی سیاسی بەسەریدا زاڵبكرێت و بۆ هەڵبژاردنی پەرلەمانی كوردستان بەخراپ بەكاربهێنرێت، بۆیە هەر پاساوێك لەلایەن هەر لایەنێكی سیاسی بهێندرێتەوە بۆ گۆڕانكاری لە كۆمیسیۆن بۆ خۆدزینەوەیە لە هەمواری یاسای هەڵبژاردن و ئەنجامنەدانی هەڵبژاردنی پەرلەمانی كوردستانە.

ئەو ئەندامەی پەرلەمانی كوردستان ئەوەشی خستەروو، پێداگیركردن لەسەر سیستەمی یەك بازنەیی بۆ هەڵبژاردنی پەرلەمانی كوردستان خزمەتی دیموكراسیەتی و هەڵبژاردنێكی راستەقینە ناكەن، لەكاتێكدا ماوەی 13 ساڵە یاسای هەڵبژاردن هەموار نەكراوەتەوە و لەماوەیەشدا كۆمەڵگای كوردەواری گۆرانكاری و گەشەسەندنی زۆری بەسەردا هاتووە و دۆخەكەش وا دەخوازێت یاسای هەڵبژاردن هاوشانی ئەم گۆڕانكارییانە هەموار بكرێتەوە.