داوا دەکرێت پشووەکانی خوێندن کەمبکرێنەوە
پۆلێکی خوێندنی بنەڕەتی
SNN
سه‌رۆكی یه‌كێتی مامۆستایانی كوردستان داوا دەکات پشووەکانی خوێندن کەمبکرێنەوە لەپێناو قەرەبووکردنەوەی دوو ساڵی رابردوودا.
عه‌بدولواحید محەمەد، سه‌رۆكی یه‌كێتی مامۆستایانی كوردستان لە لێدوانێکی ڕۆژنامەوانیدا ڕایگەیاند، “ئه‌گه‌رچی وه‌رزی یه‌كه‌می ئه‌مساڵی خوێندن تاڕاده‌یه‌كی باش به‌ڕێوه‌چوو و به‌شێكی زۆر له مه‌نهه‌جی دیاریكراو ته‌واوكرا، به‌ڵام كاریگه‌ریی ڤایرۆسی كۆڕۆنا له‌سه‌ر مامۆستایان و خوێندكاران و پڕۆسه‌ی خوێندن به‌گشتی ماوه‌و نه‌توانراوه قه‌ره‌بووی دووساڵی رابردوو بكرێته‌وه.”
سه‌رۆكی یه‌كێتی مامۆستایانی كوردستان رایگەیاندووە: “پێویسته پشووه ره‌سمیه‌كان كه‌م بكرێته‌وه و رێگا نه‌درێت به‌ناوی ئه‌و پشووانه‌وه خوێندكاران و مامۆستایان له خوێندن ساردبكرێنه‌وه، وه‌ك له پشووه یه‌ك هه‌فته‌كه‌ی سه‌رساڵ بینیمان.”
وتیشی: “هه‌ربۆ په‌كنه‌خستنی كه‌رتی په‌روه‌رده و خوێندن له‌كوردستان، پێویسته پرۆسه‌ی وه‌رگرتنی ڤاكسین دژی ڤایرۆسی كۆڕۆنا و رێكاره‌كانی خۆپارێزی بۆ مامۆستایان و خوێندكاران فره‌وانتر بكرێت، چونكه هێشتا مه‌ترسی ئه‌و په‌تایه به‌تایبه‌تی جۆری ئۆمیكرۆن هه‌ڕه‌شه‌ن له‌سه‌ر ته‌ندروستی مرۆڤ و په‌كخستنی ده‌وامی خوێندن.”
لە دوو ساڵی رابردوودا بەشێک لە بەرنامەی خوێندن تەواو نەکرا، بەهۆی بڵاوبوونەوەی ڤایرۆسی کۆرۆنا چەند جارێک دەوام راگیرا و لە سەرەتای ئەمساڵ قەرەبووی خوێندنی ساڵی پار کرایەوە.
