لە SNNەوە مەرجەكانی گەشتكردنی هاووڵاتیان لەدەروازەی باشماخەوە بۆ ئێران بزانە

SNN-عەلی حەمە سەعید
بەرپرسێكی مەرزی نێودەوڵەتی باشماخ ئاماژە بەوەدەكات: لەلایەن وەزارەتی ناوخۆوە ڕێكاری نوێ دەگیرێتەبەر بۆ هاتووچۆكردنی گەشتیاران لەڕێگەی دەروازە سنوورییەكانەوە، بۆ ئەومەبەستەش لە مەرزی باشماخەوە هاووڵاتیان دەتوانن سەردانی ئێران بكەن بەمەرجێك ئەنجامی نەرێنی پشكنینی كۆرنای پێبێت كە (48)كاتژمێر بەسەر دەرچونیدا تێ نەپەڕیبێت.

ئیسماعیل عەلی ئاغا، بەرپرسی بەشی ڕاگەیاندن و پەیوەندییەكان لە مەرزی نێودەوڵەتی باشماخ بە SNNی ڕاگەیاند: ئاماژە بە بەیانی ژمارە(1) ی ساڵی(2022) ی وەزارەتی ناوخۆی حكومەتی هەرێمی كوردستان /لیژنەی باڵای بەرەنگاربوونەوەی ڤایرۆسی كۆرۆنا تایبەت بە هاتووچۆی گەشتیاران لەڕێگەی دەروازە سنووریی یەكانەوە بڕیار دراوە كە هاووڵاتیانی عێراقی و كەسانی بیانی لەكاتی گەڕانەوە یاخود هاتن بۆ هەرێم پێویستە پشكنینی كۆرۆنایان بۆ ئەنجام بدرێت خاوەن كارتی ڤاكسینی كۆرۆنابن یاخود كاررتی ڤاكسینیان بۆ نەكرابێت.

ئاماژەی بەوەشكرد: مەرجە كە هاووڵاتیان پێش گەشتكردنیان لەڕێگەی دەروازە سنوورییەكانەوە  تێستی كۆرۆنایان ئەنجام دابێت لەو سەنتەر و نەخۆشخانانەی لەلایەن حكومەتی هەرێم و وەزارەتی تەندروستی تایبەت كراون بە ئەنجامدانی پشكنین بۆ گەشتیاران، وە پێویستە ئەنجامی نەرێنی پشكنینەكەی پێبێت كە 48 كاتژمێر بەسەر دەرچونیدا تێ نەپەڕیبێت .

ئەو بەرپرسەی مەرزی نێودەوڵەتی باشماخ ئەوەشی خستەڕوو: هاووڵاتیان تەنها دەتوانن پشكنینی كۆرۆنا لە هەریەك لە  نەخۆشخانەكانی (شەهید تاهیرعەلی والی بەگ و نەخۆشخانەی ( علی ناجی ) لەسلێمانی و هاوكات نەخۆشخانەی (وەفا) لە پارێزگای هەڵەبجە ، ئەنجام بدەن و بە پێچەوانەوە كار بەپشكنینی دیكە ناكرێت لەكاتی گەشتكردنیان بۆ ئێران ئەم ڕێكار و بڕیارە نوێیانە لە ئەمڕۆ چوارشەمە لەدەروازەی باشماخەوە جێبەجێ دەكرێن.