لەدوای هەڵاتنی زیندانیکراوانی داعش لە سوریا؛ عێراق سنوورەکانی توندەکات

SNN

شەوی رابردوو ژمارەیەک زیندانیکراوی داعش لە زیندانێکی حەسەکەی رۆژئاوای کوردستان هەڵاتن و مەترسی ئەمنییان بۆ سەر عێراقیش دروستکردووە، بەوهۆیەوە لە شەوی رابردووەوە عێراق هێزی زیاتری بردووەتە سنووری نێوان دوو وڵارەکە.

فەرماندەی ئۆپراسیۆنە هاوبەشەکانی عێراق رایگەیاند: هێزە ئەمنییەکانی عێراق رێکاری ئەمنی توندیان لە سنووری سوریا گرتووەتەبەر دوای ئەوەی زانیارییان پێگەیشتووە کە زیندانیکراوانی داعش هەڵاتوون، هاوکات بە فڕۆکەی بێفڕۆکەوان چاودێری ناوچە سنوورییەکان دەکەن تا رێگری لە هەوڵی هاتنە ناوەوەی هەر چەکدارێکی داعش بکەن.

شەوی رابردوو ئوتومبیلێکی بۆمبڕێژکراو لەبەردەم زیندانێکی حەسەکەدا تەقییەوە و ژمارەیەک زیندانیکراوی داعش هەڵاتن کە ژمارەیان بەگوێرەی سەرچاوەکان دەگاتە دەیان کەس.