وەزارەتی ئاوەدانکردنەوە روونکردنەوە لەسەر مەترسی تونێلێک دەدات
SNN
وەزارەتی ئاوەدانكردنەوەو نیشتەجێكردن ڕایگەياند: چەند گرفتێك لە پۆڕتاڵی دیواری دەرەوەی تونێلی ماوەران درووستبووە و پەیوەندیی بە خودی تونێلەكەوە نییە.
وەزارەتی ئاوەدانكردنەوەو نیشتەجێكردن لە ڕاگەیەنراوێكدا ئاماژە بۆ ئەوەدەكات: دوای بەدواداچوونی ووردی تەكنیكی بۆ تونێلی ماوەران لە نزیك قەزای شەقڵاوە لە پارێزگای هەولێر، تونێلەكە درزی نەبردووە و ستراكچەری تونێلەكە سەلامەتەو هیچ مەترسییەك لەسەر داڕمانی نییە.
راشيگەياندووە: دوای بەدواداچوونی ووردی تەكنیكی، دەركەوت كە بابەتەكە بەوشێوازە نیەو ئەوەی هەیە، درووستبونی چەند گرفتێكە لە پۆڕتاڵی دیواری دەرەوە، وەكو كەوتنی چەند شوێنێك لە لاشانەكان یاخود وردبونی چەند درزێك لە دیوارەكە ئەویش تەنها چینی ڕووپۆشی دیوارەكەی دەرەوەیە هیچ پەیوەندیەكی بە خودی تونێلەكەوە نییە.
ئاشكراشیکردووە: ئەو كەموكوڕیانەی درووست بوون لە ئەنجامی ڕاوەستان و كارنەكردنە لە پڕۆژەكەدا كە بەهۆی قەیرانی دارایی و خەرجنەكردنی شایستە داراییەكانی بەڵێندەر، ماوەی (6) ساڵە ڕاوەستاوە.
تونێلی ماوەران بەشێكە لە پڕۆژەی درووستكردنی جوتسایدی كۆڕێ- شەقڵاوە- قەندیل، بە درێژی 935م، پێكهاتووە لە دوو سایدی چون و هاتن، گشت بڕگەكانی شارستانی لەناو تونێڵەكە تەواو بووە، ئەوەی ماوە تەنها بڕگەكانی ئیلیكترۆمیكانیكی و كارەبایی ناوەوەیە، پڕۆژەكە بە گشتی لە %86ی كارەكانی تەواو بووە.
وەزارەتی ئاوەدانكردنەوە ڕوونیدەكاتەوە: بەرپرسیاریەتی پڕۆژەكە لە تەواوكردن و چاككردنەوەی هەر كەموكوڕیەك لە ئەستۆی كۆمپانیای جێبەجێكارە لە داهاتوودا.
ئاماژەی بەوەشكردووە: لەسەر داوای هاتوچۆی هەولێر و لەسەر فەرمانی پارێزگای هەولێر بە مەبەستی كەمكردنەوەی بەشێك لە تڕافیكی سەر ڕێگای قەزای شەقڵاوە بەتایبەتی ڕۆژانی پێنج شەممە و هەینی كە خەڵك بۆ گەشت سەردانی ناوچەكانیان دەكرد ئەم ڕێگایە كرایەوە، هەرچەندە ڕێگاكە و تونێڵەكە تەواو نەكراون و پڕۆژەكە وەستاوە و هاتوچۆ پێیدا پەسەند و گونجاو نییە.
