لوقمان وەردی: دەروازەی سمێلكا بە بڕیارێكی سیاسی داخراوە
SNN-عەلی حەمە سەعید
ئەندامێكی پەرلەمانی كوردستان ئاماژە بەوەدەكات: ماوەی مانگێكە دەروازەی سنووری سمێلكا لەنێوان باشوور و ڕۆژاوای كوردستان داخراوە لەكاتێكدا بە بێ ئەوەی حكومەت بە فەرمی هیچ بڕیارێكی دەركردبیت بەداخستنی ، بۆیە تەنها بە بڕێارێكی سیاسی ئەو دەروازە سنورییە داخراوە و نابیت ململانێی نێوان دوو هێز ببێتە هۆی زیان گەیاندن بە هاووڵاتیانی كوردستان ودەبێت دەستبەجێ دەروازەی سێمالكا بكرێتەوە.
لوقمان وەردی، ئەندامی پەرلەمانی كوردستان بەSNNی ڕاگەیاند: درێژەدان بە داخستنی دەروزەی سنووری نیوان باشوور و ڕۆژئاوای كوردستان جگە لەوەی بڕیارێكی سیاسییە هیچ بڕیارێكی حكومی نییە لەبارەی داخستنی ئەو دەروازە سنورییەوە كە ماوەیەكی زۆرە داخراوە تائێستاش حكومەتی هەرێم بەفەرمی بڵاوی نەكردووتەوە كە ئەم دەروازەیەی داخستووە.
ئاماژەی بەوەشكرد: داخستنی دەروازەی سێمالكا كارێكی نادروستە چونكە تاكە دەروازەیە باشووری كوردستان بە ۆژئاوای كوردستانەوە دەبەستێتەوە، هاوكات تاكە ڕێگایە كە لەهەرێمی كوردستانەوە هاوكاری هاووڵاتیانی ڕۆژئاوای كورستان بكریت چونكە ئەم دەروازیە پەیوەستە بە ژیان و گوزەرانی خەڵكی ڕۆژئاوا و ناكرێت خەڵكی ڕۆژئاوا بكرێنە قوربانی ململانێ سیاسیەكانی نێوان دوو هێزی سیاسی ئەوە سەرەڕای ئەوەی كە بەردەوامیدان بەداخستنی ئەو دەروازە سنورییە خزمەت یەكڕیزی و یەكێتی نەتەوەكەمان ناكات.
ئەو پەرلەمانتارەی هەرێمی كوردستان ئەوەشی ڕوونكردەوە: كە دەبێت بەزووی حكومەتی هەرێم دەروازەی سێمالكا بكاتەوە چونكە هیچ هۆكارێك نیە بۆداخستنی ئەم دەروازەیە، لەكاتێكدا پەیوەندیە كۆمەڵایەتییەكان و ئاڵوگۆرە بازرگانیەكان و پێداویستیەكانی ڕۆژانەی خەڵك و كەرەستە تەندروستیەكان لەگەڵ ڕۆژئاوای كوردستان تەنها لەرێگەی ئەو دەروازەیەوە ئەنجام دەدرێت.
وتەكانی ئەو پەرلەمانتارە لەكاتێكدایەكە لە ڕۆژی ١٦ی كانونی یەكەمی ساڵی ڕابردووەوە، بە بڕیارێكی سیاسی پارتی دیموكراتی كوردستان دەروازەی سنووریی سێمالكا و وەلیدیان بەڕووی ڕۆژئاوای كوردستاندا داخستووە، زیاتر لە مانگێكە ڕێگە بە هیچ جموجوڵێكی بازرگانی و هاتوچۆی هاووڵاتیان لەو دەروازانەوە نادرێت.
