لەبارەی دابەشکردنی پارەی کارمەندانی کۆمسيۆن لە هەرێم روونکردنەوە دەدرێت

SNN-عەلی حەمە سەعید

بەرپرسی ئۆفیسۆی سلێمانی كۆمیسیۆنی باڵای سەربەخۆی هەڵبژاردنەكانی عێراق ئاشكرایكرد: لە چەند پارێزگایەكی عێراق دەستكراوە بەدابەشكردنی پارەی چاودێرانی كۆمسیۆنی هەڵبژاردنەكان و لەچەند ڕۆژی داهاتووشدا پارە دەخرێتە سەر ژمارە حسابی پارێزگاكانی هەرێم و لە ڕێگەی  بانقەكانەوە پارەی كارمەندانی كۆمیسۆن دابەشدەكرێت.    

ئامانج عەزیز، بەرپرسی ئۆفیسی سلێمانی كۆمسیۆنی باڵای سەربەخۆی هەڵبژاردنەكانی عێراق بە SNNی ڕاگەیاند: پرۆسەی دابەشكردنی پارەی چاودێرانی كۆمیسیۆن كە لە ڕۆژی هەڵبژاردنەكانی پەرلەمانی عێراق وەك كارمەندی كۆمیسیۆن دامەزران لە چەند پارێزگایەكی عێراق دەستپێكردووە و بەدڵنیاییەوە لەچەند ڕۆژی داهاتووشدا لە پارێزگاكانی هەرێمی كوردستانیش دەست بەو پرۆسەیە دەكرێت.

ئاماژەی بەوەشكرد: لەلایەن كۆمیسیۆنەوە بڕی پارەی پێویست دەخرێتە سەر ژمارە حسابی كۆمیسیۆن لە هەرپارێزگایەك و ئێمەش لەلای خۆمانەوە پارەكە ڕەوانەی بانق دەكەین و لە بانقەكانەوە چاودێرانی كۆمیسیۆن دەتوانن پارەكانیان وەربگرن، كە لە سنووری پارێزگای سلێمانی 17 هەزار كارمەندمان هەبووە.

ئەو بەرپرسەی كۆمسیۆنی باڵای سەربەخۆی هەڵبژاردنەكانی عێراق ئەوەشی خستەڕوو: بۆ ئەو چاودێرانەی كە فەرمانبەری حكومین بڕی 150 هەزار دینار و هەروەها پێدانی ڕێزوسوپاسێكیان ئاراستە دەكرێت، هاوكات ئەو چاودێرانەشی كە فەرمانبەری حكومەت نین و دەرچووی زانكۆو پەیمانگاكانن بری 250 هەزار دیناریان پێدەدرێت.