کونسوڵخانەی ئەمريکا: ئامادەین هاوکاری حکومەتی هەرێم بکەين
SNN
کونسوڵخانەی ئەمريکا لە هەولێر لە راگەيەندراوێکدا باس لە حاڵەتەکانی توندوتيژی بەرامبەر ژنان و کوشتنی چەند ژنێک دەکات لەم ماوەی دوايدا و دەڵێت “ئێمە هاوکاری حکومەتی هەرێمين، بۆ بەدەستهێنانی دادپەروەری و کۆتاییهێنان بە توندوتیژی و پارێزراوی و پاراستنی مافەکانی هەموو هاووڵاتیان.
کونسوڵخانەی ئەمريکا لە هەولێر لە پۆستێکيدا لە فەيسبوک بڵاويکردووەتەوە: ویلایەتە یەکگرتووەکانی ئەمريکا هاوبەشی پەرۆشی سەرکردەکانی هەرێمی کوردستان دەکات دەربارەی هەڵکشانەکانی بەمدوواییانەی توندوتیژی و کوشتن و پێشێلکردنی مافەکانی ژنان و پێکهاتە پەراوێزخراوەکانی تر.
راشيگەياندووە: دەبێت ئەوەی پێی دەوترێت “کۆشتن لەسەر شەرەف” وەکو کوشتنەکانی بەمدوواییانەی ئیمان “ماریا” سامی مەغدید و مریەم یەعقوب و عەیدێ موحەمەد لێکۆڵینەوە دەربارەیان ئەنجامبدرێت و وەڵامدانەوەیەکی یاسایی بەدوادابێت و ئەنجامدەرانیان بەرپرسیاربکرێن. دەشڵێت “ئێمە هانی حکومەتی هەرێم دەدەین بۆ بەردوام بوون لەسەر هەنگاونانی مانادار بۆ بەدەستهێنانی دادپەروەری و کۆتاییهێنان بە توندوتیژی و پارێزراوی و پاراستنی مافەکانی هەموو هاوڵاتیان و هەروەها ئێمە ئامادەین بۆ هاوکاری.
