هەوڵەكانی بافڵ جەلال تاڵەبانی بەردەوامە و لە هەفتەی داهاتوو پاڵپشتی دارایی خوێندكاران خەرجدەكرێت

SNN-عەلی حەمە سەعید

د. توانا نەجەف، بەڕێوەبەری كارگێڕی و دارایی لە وەزارەتی خوێندنی باڵا و توێژنەوەی زانستی حكومەتی هەرێم بە SNNی ڕاگەیاند: لەگەڵ دەستپێكردنەوەی دەوامی زانكۆ و پەیمانگاكان دەستدەكرێت بەدابەشكردنی پارەی پاڵپشتی دارایی بۆ خوێندكارانی زانكۆ و پەیمانگاكان بۆ مانگی دووەم .

ئاماژەی بەوەشكرد، رێكارەكانی دابەشكردنی ئەو پاڵپشتییە داراییە بۆ خوێندكاران تەواو بوون و لە ڕۆژی  یەكشەممەی داهاتوو دەستدەكرێت بە دابەشكردنی ئەو پاڵپشتییە داراییە كە مانگانە 40 هەزار دینار دەدرێتە ‏ئەو خوێندكارانەی ناوەوەی شار كە لە زانكۆلاین وەرگیراون و 60 هەزار دیناریش ‏دەدرێتە ئەو خوێندکارانەی كە لە دەرەوەی شار لە زانكۆلاین وەرگیراون.

خەرجكردنی پاڵپشتی دارایی بۆ خوێندكارانی زانكۆ و پەیمانگاكان، دوای كۆبوونەوەكانی بافڵ جەلال تاڵەبانی و نوێنەری زانكۆ و پەیمانگاكان بوو كە بەڵێنی ئەوەی پێدان هەوڵەكانی بەردەوام دەبێت بۆ چارەسەركردنی گرفتەكانیان و خەرجكردنی دەرماڵەی خوێندكاران هاوكات لەسەر ئەركی یەكێتی نشتیمانی كوردستانیش نۆژەنكردنەوەی و پێداویستییەكانی بەشە ناوخۆییەكانی زانكۆ و پەیمانگاكانی جێبەجێ كرد.