دەست بە بڕینی بەشەخۆراکی بەشێک لە هاووڵاتیان دەکرێت
SNN
نەوزاد شێخ كامیل، بەڕێوەبەری گشتیی بازرگانی هەرێم رایگەیاند، ئەو فەرمانبەرانەی مووچەیان لە ئاستێكی بەرزدایە و ئەو بڕەی كە وەزارەتی بازرگانی عێراق دیاری كردووە، دەست بە بڕینی بەشەخۆراكیان كراوە.
روونیشیکردەوە، بەشەخۆراكی ئەوان راستەوخۆ لە بەغدا دەبڕدرێ و پێیان نادرێت، دووپاتی كردەوە، ئەو بڕینە سەرەتا بۆ فەرمانبەرانی سەر بە حكوومەتی عێراقە، چونكە هەر لە بەغداوە كاریان لەسەر دەكرێت.
نەوزاد شێخ كامیل ئاماژەی بەوەشکرد، ئێستە پرۆسەكە دەستی پێ كردووە، بەڵام بۆ ئەو فەرمانبەرانەی كە مووچەیان لەسەر حكوومەتی عێراقە و لە هەرێمی كوردستانن، ئاماژەی كرد، ئەوانەی مووچەیان لە ملیۆنێك و 500 هەزار بۆ سەرەوەیە، بەشەخۆراكیان راستەوخۆ لە بەغداوە دەبڕدرێت و ناتوانن لە هەرێم وەری بگرن، بەڵام پسوولەی خۆراكیان دەمێنێت.
ئەو بەرپرسەی وەزارەتی بازرگانی هەرێم باسی لەوەیش كرد كە ئێستە ئەو پرۆسە بۆ مووچەخۆرانی هەرێمی كوردستان كە مووچەیان لە لایەن حكوومەتی هەرێمەوە دەدرێت دەستی پێنەكردووە، بەڵام ئەوانەی سەر بە بەغدان هەر لە بەغداوە بەشە خۆراكیان دەبڕدرێت، لە سەرانسەری هەرێمی كوردستانیش بەشەخۆراكی ژمارەیەك مووچەخۆری عێراق بڕاوە.
